جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج
بقلم ـ نشأت البسيوني
في لحظة معينة من حياتك هتعرف إنك اتولدت في معركة مش في دنيا وإنك كنت بتحارب وانت لسه ما نطقتش كلمة وإن كل خطوة مشيتها كانت أصعب بكتير من اللي ظاهر للناس الناس تشوفك واقف تقول قوي ما يعرفوش إنك واقف على قدم واحدة والتانية مجروحة للدرجة اللي ما بتتحملش اللمس الناس تشوفك بتضحك تقول مرتاح وما يعرفوش إن الضحكة نفسها كانت محاولة
تنقذ بيها روحك من السقوط الدنيا ما بترحمش حد ويمكن ما اتخلقتش اصلا عشان ترحم حد اتخلقت عشان تختبر مين اللي هيكمل ومين اللي هيقع مين اللي هيصدق نفسه ومين اللي هيسمع صوت اللي بيكسر فيه مين اللي هيقاوم الوجع ومين اللي أول ما يشوف العاصفة هيرفع إيده ويسلم وينتهي قبل ما يبدأ بس في ناس ربنا خلقها من معدن تاني ناس مهما اتخبطت ما بتنكسرش
ومهما اتحاربت ما بتهربش ومهما اتظلمت ما بتموتش جواها النار اللي بتقومها ألف مرة بعد كل سقوط الناس دي ما بتتعلمش الهروب بتتعلم المواجهة وما تعرفش يعني إيه يستسلموا حتى لو اتسحب منهم كل سند وكل ظهر وكل باب كان مفتوح وفي كتير من اللي بيعدوا في حياتنا يفتكروا إن هدوءنا ضعف وإن صبرنا سذاجة وإن سكوتنا استسلام وهم مش فاهمين إن الهدوء قوة والصبر حكمة
والسكوت قرار أكبر من طاقتهم على الفهم وإن اللي بيعدي فوق قلبنا من ثقل ومن جروح ومن خيبات يكفي إنه يصنع جبل من الجواهر جوانا مش مجرد إنسان في ناس من بره شكلهم عادي بس من جوه قاعدين على جبل من الألم والصلابة وإنك تشوفهم واقفين دي لوحدها معجزة لأن الحمل اللي شايلينه مش طبيعي ولا مفهوم ولا قابل للشرح ومش مطلوب أصلاً يشرحوا ومش واجب
أصلاً يفهموا حد اللي بيتمسك بالحياة بعد كل اللي شافه ده بطل مش محتاج تصفيق الحقيقة المرة إن عمر ما الدنيا هتخفف عليك الوجع بس الحقيقة الأجمل إنك انت اللي هتخفف على نفسك وانت اللي هتتعلم تشيل روحك في عز انهيارها وتهدي قلبك في عز خوفه وتمسح دموعك بإيدك لأنك اكتشفت إن أعظم سند ليك هو انت وإن أقوى نسخة منك اتولدت في اللحظة اللي كل شيء فيها
وقع وفي الآخر تلاقي نفسك واقف رغم كل اللي فوق احتمالك ويمكن علشان كل اللي حصل ده ما كانش بيكسر فيك ده كان بيبنيك ولولا اللي وجعك ما كنتش هتبقى قوي ولولا اللي سابك ما كنتش هتعرف نفسك ولولا اللي انطفى من حواليك ما كنتش هتشوف نورك وانت يمكن ما تعرفش قد إيه أنت صامد بس اللي يشوفك من بره يعرف لأن الصمود له هالة نور محدش يقدر يزيفها
