( لدائِك نجاه )

( لدائِك نجاه ) – الحلقة الاولي من سلسه رحمه من الرحمن

بقلم / رحمة أحمد

جبر الخواطر علاج رباني، والكلمة الحلوة بتصنع معجزات و بتهون علينا الوجع .. لا هو بفلوس ولا بيتباع ف صيدليات وريحته سهله جدا.

حسوا باحتياج اللي حواليكم بدون كلام ركزوا ف نبره الصوت ف نظره العين والتفاصيل الضحكة اللي بيبقى مداري وراها وجع ف ناس بتستحي تطلب للمساعدة .. ف ناس محتاجه بس للي يسمعها.

كل واحد فيكم ربنا شايل له رزقه .. رزقه من الحب ومن الخير هيجيله في الوقت المناسب فكن واثق نصيبك هتاخده بالكامل بدون حرج وبدون تعب ووجع قلب فبلاش الاستعجال .. وتأكد انك لما معادله الوقت والشخص والظروف هتكمل ..هتاخد رزقك بالكامل وخلي دايما في بالك الآية اللي بتقول  ( وَٱصْبِرْ لِحُكْمِ رَبِّكَ فَإِنَّكَ بِأَعْيُنِنَا ).

إطمن وسيب اللي يتكلم يتكلم واللي يخطط يخطط…واتقِ انت ربنا ف شغلك وركز فيه زي ما انت…دافع عن نفسك ف حدود اخلاقك ومتاذيش حد ولا في قول ولا في فعل .. ثق ان ربنا مش هيسيبك وهيحفظك وانت بنفسك هتتفاجئ بتدابير ربنا وهيجبلك حقك اضعاف ما انت متخيل.

جبر الخواطر ده أعظم حاجه ممكن الإنسان يعملها .. إنك تخلي حد يبات وهو مبسوط وسعيد…دعواته بس مش هيحرك بيها لسانه .. ده هيدعيلك من جوا قلبه ..ف ياريت بلاش نكسر قلب حد…ونحافظ علي مشاعر بعض الايام صعبه بيهونها الناس السهلة اللينة.. كلمات بسيطة بتفرق في حياتنا كتير .. كلمات بسيطة جدا في نطقها لكن عظيمه جدا في تأثيرها ولو الظروف قاسيه خلينا احنا حنينين .. اجبروا بخاطر الناس ربنا هيجبر بخاطركم .

معظمنا للأسف ممكن يكون بيعاني من حزن .. أو بيعاني من حاجه .. شايل همها وبيفكر فيها دايما .. بس ممكن كلمه بسيطه جدا .. تجبر بخاطره وتهون عليه الحمل اللي هوا شايله ده.

انك تكون سبب انك تجبر بخاطر حد.. وينام وهوا مبسوط تأكد مليون ف الميه ان هوا عمره ما هينسهالك ابدا او انك لما تلاقي حد عمل معاك معروف حتي لو بسيط عمرك ما بتحقر من شأن المعروف عشان ان انت متكسرش بخاطره او ان انت تخفف علي حد حزنه .. او تخفف علي حد وجعه ..عمره ما هينسهالك ابدا وهيفضل شايلهالك جميله طول عمره .. جبر الخواطر عمره ما كان مكلف ابدا .. بالعكس جبر الخواطر عباده علي قد ما هيا عظيمه جدا ..علي قد ما هيا بسيطة جدا ومش مكلفه اطلاقا .. جبر الخواطر ممكن تكون ف ابتسامه او طبطبه علي حد قريب منك او ممكن تكون كلمه شكرا لما حد يعمل فيك معروف او يقف جنبك ف حاجه .

اللي بيجبر بخاطر الناس دايما تلاقيه محبوب ودايما تلاقي كل الناس حواليه .. ودايما تلاقي كل الناس بتتمني ان هيا تصاحبه ربنا بيقول ( وَلَوْ كُنتَ فَظًّا غَلِيظَ ٱلْقَلْبِ لَٱنفَضُّواْ مِنْ حَوْلِكَ ) الناس اللي قلوبهم قاسيه .. والناس اللي ممكن بكلام تكسر بخاطر الناس اللي حواليها هتلاقي كل الناس بتبعد عنها و هتلاقي كل الناس مبتحبش ان هيا تكون موجوده حواليها.

ممكن تجبر بخاطر حد ولو بكلمه بسيطة هتلاقي ربنا سبحانه وتعالي يسخر لك اللي يجبر بخاطرك في وقت ما انت تكون ضعيف وتلاقي ربنا يسخر لك اللي يطبطب عليك في وقت ما انت تكون محتاج الطبطبة دي .. ف يا بخت اللي يجبر بخاطر الناس اللي حواليه وربنا يخلي لنا الناس اللي بتجبر بخاطرنا.