جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
===== في الغربة غريب =====
بره الأوطان
بنحس بالغربة
لو في أي مكان
أنا برضه غريب
ماشي ومش داري
لفين أنا رايح
عايز أرجع
مش قادر أغيب
ما هيه في دمي
مصر حبيبتي
غرقان في هواها
وفراقي صعيب
بره الأوطان
الصورة معايا
ساكنة جوايا
صورة النيل
والمية فيه تجري
جاية من قبلي
لقلوبنا بتروي
والشمس والهوى
دوا وطبيب
فاكر فيها شجرة
بتطرح جميز
على راس الساقية
وثمارها تقول سكر
وقت ما تطيب
فاكر أشجار توتها
الأبيض وجنبه الأسمر
ونخيلها ورطبه
نطلع ونجيب
فاكر شوارعها
وزينة رمضان
وفرحة ناسها
لما هلاله يبان
ويفرحوا بالعيد
بعكعه وبسكوته
على طول الأزمان
عمرها عني
أبدا ما تغيب
فاكر أفراحها
والناس مع بعضيها
واقفين بيهنوا
ويغنوا أغانيها
مصر بلادي حبيبتي
احفظها وعليها
يارب تحييني
وأرجع تاني إليها
وأموت فداكي بلادي
وقبري يكون فيها
وأكون فيها قريب
بقلمي
صلاح شعبان الفيداوي
