جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
يوسف مصطفى – كفر الشيخ
جاتني امى في المنام
وكانها على كرسى جنبي
قالتلي فينك يابن بطنى
حتي مستخسر زيارة
قلتلها في الدنيا يا أمى
قالتلي دنيتكم خُسارة
قلتلها مطحون فى الرحايا
بجري جري الوحش فيها
ومش ملاحق فى النهاية
قالتلي يابني عيش حياتك
وارضى ربك وارضى ذاتك
مش هاينفع الا عملك
اعمل الصالح تملي
زكِّي يابني
صوووم وصلي
وخلي فعل الخير امامك
خلي ذكر الله تملي فوق لسانك
ادعي يابني ف كل لحظة
مش عشاني …لأ.. عشانك
دا الدعاء هايعَلي شانك..
واوعى يابنى من الحرام
أو يدخل جوفك حرام
او يدخل جيبك حرام..
قلتلها حاااضر ..طمنينى.
اشحاله قبرك!!؟
ظل وظليل وللا حرور. !!؟
قالتلي يابني كله نور
أد ايه ربك رحيم
أد ايه ربك غفور
كنت رايحاله وشايله
فوق كتافي الف ذنب..
بس كان جوايا قلب..
ابدا ماكان كاره لحد .
ربنا رحماته اوسع
مما يتصور خيالك..
ابتسمتلها بسعادة
وقلت يا اما دي مكتوبالِك..
زيديني يا اما في النصيحة..
قالت:.. هاقولها لك صريحة:
اوعي يابني ف مرة تظلم
او تكون أداه لظلم..
انصف المظلوم تملي
وخلي قلبك فاضى ظلم..
وخللي يابني بالك من ابنك..
قل له ستك فرحنالك
وبلغه النصحية ديت :
قل له خد بالك من امك
عشان تشوف بركة عيالك..
في رضاها السعد يابني..(يابن ابنى)
مهما تِعلا وللا تبني
خلى بالك من خواتك
هما دول مالك و زادك
هما دول هما امتدادك..
قلتلها يا اما نفسي اجيلك من زمان..
قالتلي يابنى كله بأوان
كل واحد له أوان
بالمكان .. وبالزمان..
رحت وا اخدها فى حضنى
كنت بعملها زماان..عشان انام..
صحيت على صوت الاذان .
قمت صليت فجر يومى..
ودعيتلها خلف الامام..،،،
شفت امى فى المنام
من حلاوة الحلم نفسي
اروح ومن تاني..انام ..
عشان اشوفها فى المنام،،
يوسف مصطفى .كفر الشيخ ..جريدة الوطن الاكبر- الاثنين 13 يونيو2022
