شعور شهيد

شعور شهيد
بقلم رجب أبو الحسن

شعور جديد
مش جدة معناها الجميل
ده شعور بيحصل للقتيل
شعور شهيد

دقت طبول الحرب
قام مستعد
استل سيفه
و قام يمد
يلهد ولا حصان من خيول مغول
ما اسموش هولاكو إنما
فارس يسد

دارت معارك وقف
ابن الوليد
في القبضة دي خنجره
و السيف ف إيد
يضرب يزود
الضربة من سيفه البارود
و الدرع طوق يحمي الوريد

الدرع فوق القلب
يا سارقين القلب هنيالكم
فارس بطل مغوار
وقت الهياج جالكم
حالف ما ريح هتهب
و لا يهدأ غير بالكم
و لا عدا هتكر
الا و يكون حاضر
لجل الفدا ما يفر
فارس و ببخاطر
حالف ما سوء و لا شر
للقلب و الخاطر

يا ساكنين و الدرع حامي
حمى الوطيس ما اتمس
يا سارقين القلب
ما حد غار و لا جس
الدرع أصله حديد
في الشدة زاد ما يخس

فجأة ف عز الحرب
و الصلبل غارة
حصاد من الأموات
و الساقية دوارة

صليل ف قلب صهيل
موجة ورا موجة
و الفارس المغوار
في زئيرها دي الهوجة

صاب الجدع سهمه
من قلب كان صدقه
السهم كان مصاص
للدم مين أطلقه ؟
القلب ؟!
طب ليه زمان تسرقه
علمته يضربني أني
و الصدق كان مبدأه
السهم ده منك؟
و الله ما مصدقه
مات الجدع على إيد
قلبه اللي قال بعشقه