جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
بقلم / احمد الخولى
الجزئ الثاني
بكيت على اخى وعلى الهزيمه بحرقه لقيت ابى رحمه الله عليه بيقولى لو بتعيط على اخوك فاخوك شهيد ولو بتعيط على الهزيمه متقلقش دى مجرد جوله ولسه الحرب دايره هدخل اخوك ابراهيم الجيش من بكره مش هنسيب تارانا والريس راجل صعيدى مش هيسكت واعمل حسابك هتتجوز بنت عمك الاسبوع الجاى
استغربت ابويا قوى وقولته ايه يا عم صابر الصبر والقوه دى قالى احنا مصريين اشد اجناس الارض وحقنا وتار اخوك وعمك راجعين وهجوزك علشان تخلف رجاله يكملو المشوار عرضنا غالى يابنى دخلت افكر فى كلام ابويا وفى موضوع الجواز وبدأت اخطط هسيب السيده زينب وانقل فى شقق مدينه نصر الى عملها الريس للموظفين
وفعلا روحت الشغل وسالت قالولى تاخد جواب من الاداره وتروح المحافظه تنقى الشقه وتستلم علطول
وبالفعل استلمت شقه فى مدينه نصر الحى السابع اينعم كانت صحرا بس كان فى كل مقومات السكن حتى موقف الاتوبيس وروحت افرح ابويا وفعلا كان كلم عمى على الجواز ولا كأن اخى استشهد بصبر وقوه غريبه وبعدها بيومين لقيت ابويا بيصرخ ويقول لا متمشيش جريت اشوف فى ايه.
عبد الناصر تنحى
ساب الحكم
سابنا
لقيت ابويا بيجرى زى المجنون ويقول مش هسيبه يعمل كده وفتح الباب ونزل جرى جريت وراه الحقه اول مره اشوف دموع ابويا ابويا عم صابر ميعرفش عبد الناصر هيروحلو فين ويقولو ايه نزلت لقيت الناس كلها فى الشارع بتزعق وتقول لا متمشيش ستات ورجاله وحتى الشباب الصغير مكنتش مستوعب عبد الناصر يمشى
الاول كنت مشغول بابويا بس لقتنى بعيط واقول لا وبجرى مع الناس ورجع عبد الناصر فى قرار التنحى
واخويا ابراهيم دخل الجيش واتجوزت زينب بنت عمى وعرفت يعنى ايه حب ويعنى ايه اهتمام واحترام ست بطعم امى مكنتش متعلمه بس كانت مثقفه حافظه القرآن فى الكتاب وبتسمع الراديو وتشوف التليفزيون
حبتها لدرجه العشق وخلفنا بعد الجواز علطول جبت ابنى صابر سميته على اسم ابويا وقررت اعلمه الدرس
الارض عرض وبعدها بسنه خلفت زينب سمتها على اسم امها علشان تطلع زيها ورده مفتحه تنور حياتنا
ومرت الايام واحنا اسره صغيره طالعه من اسره كبيره لازم نقضى الخميس والجمعه فى بيت السيده
مع ابويا وامى واخواتى وعمى وعيلته ابويا تعب والمرض هلكه بس كان دايما اسم على مسمى صابر وهو صابر وبيصبرنا ودايما يقول لابراهيم اخويا كل اجازه ترنا فى رقبتك عرضنا لازم يرجع ويبص لاخى ذكريا الصغير ولو ابراهيم راح هيبقى دورك تاخد التار ومن بعدك صابر ابن اخوك صالح وفى يوم عصيب مات عبد الناصر مات السند والضهر مات القدوه مات اب كل المصرين والعرب ابويا بكى واصر ينزل يودعه وهو تعبان وبيصارع المرض وفعلا نزلنا الجنازه زى كل مصر ما نزلت ورجعنا بيتنا ابويا قالى متنساش يا صالح ارضك عرضك اوعى تفرط وتسيب حقك ومات عم صابر ابويا الحبيب.
انتظروا غدا الجزء الثالث من قصه عم صالح
