جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج
بقلم ـ نشأت البسيوني
في وقت معين بتلاقي نفسك واقف قدام مرايه عمرك مش علشان تشوف شكلك لكن علشان تفهم انت وصلت لحد فين من اللي حصلك من اللي كسر ومن اللي سايب أثره جواك من الناس اللي عدت من حياتك وسابتك واقف لوحدك من غير إجابه على سؤال واحد ليه كل دا حصل وليه انت تحديدا تتحمل كل دا ورغم إن السؤال صعب ورغم إن الرد أصعب لكنك تلاقي جواك صوت
ضعيف بس حقيقي بيقول لك يمكن علشان ربنا كان بيجهزك لمرحله ما ينفعش يدخلها إلا اللي اتعلم واتوجع واتصقل واتنضج بطريقه ما يقدرش حد غيره يتحملها ويمكن علشان كل ضربة اتحطت عليك كانت بترسم حدود جديده لشخصيتك وحدود اكبر لقوتك اللي انت نفسك ما كنتش شايفها وفي الأيام اللي كنت فاكر انك هتقع ومش هتعرف تقوم كانت الحياه بتختبر صبرك مش
ضعفك كانت بتقيس مقدار احتمالك مش مقدار ألمك كانت بتقول لك بطريقتها انك تقدر وانك لو مش قدها ما كانتش هتحصل لك بالشكل دا وفي اللحظات اللي كنت بتحسس فيها على وجعك وكأنك بتتأكد انه لسه موجود كانت روحك بتتعلم من غير ما تحس كانت بتتبني كانت بتتشكل من تاني زي ما الحديد بيولعوه بالنار مش علشان يتكسر لكن علشان يقوى ويتصلب ويتحول لحاجه ما
تتقارنش باللي كان قبلها والعجيب ان اكتر الحاجات اللي وجعتك هي نفسها اللي فتحت قدامك أبواب ما كنتش هتشوفها لو فضلت مرتاح وان اكتر القلوب اللي كسرتك علمتك ازاي تحب نفسك قبل ما تحب حد وان اكتر الطرق اللي وقعت فيها علمتك ازاي تقف من غير ما تمد إيدك لحد ولو حد شافك دلوقتي يمكن يشوف فيك صلابه يمكن يشوف عيون اتغيرت من كتر اللي شافته يمكن يشوف
ابتسامه هاديه بس وراها قصص محدش يعرفها غيرك بس اللي محدش هيشوفه هو الحروب اللي خضتها في سكات هو الصراع اللي عديت عليه ليل ورا ليل هو الدعاء اللي طلع منك وانت مش قادر هو الكسر اللي جمعت روحه بيدك ومع كل دا تفضل واقف واقف مهما حاولت الأيام تشيلك من مكانك واقف لأنك عرفت إن ماحدش هيشيلك غيرك واقف لأنك فهمت إن القوه مش إنك ما
تتوجعش القوه إنك تتوجع وتصمد وتعدي وتكمل من غير ما تفقد نفسك وحتى لو الدنيا لسه مش دايما حنونه وحتى لو لسه في غدر وفي ناس لبسوا أقنعه وفي ذكريات بتوخز القلب كل فتره برضه تلاقي جواك حاجه بتقول لك كمل مش علشان حد يستاهل ولا علشان حد ينتظر لكن علشانك انت علشان انت اللي شيلت كل دا وانت اللي اتكسرت واتجمعت وانت اللي دفعت تمن مشوار طويل
محدش غيرك يعرف تفاصيله وفي آخر السطر هتعرف إن اللي اتاخد منك ما كانش خساره وإن اللي اتعلمته ما كانش مجاني وإن اللي حصل لك ما كانش عبث وإنك كل يوم بتكبر من جوه حتى لو ما حدش شايف حتى لو محدش حاسس حتى لو محدش فاهم وإن الطريق مهما طال لازم يوصلك لحتة أمان حقيقيه مش أمان حد بيقدمه لك لا أمان انت بتصنعه بإيدك باللي شوفته واللي
اتعلمته واللي قدرت تعدي بيه من غير ما تنهار ويمكن الحياه لسه مخبيه ليك أجمل مما تتخيل ويمكن الجرح اللي انت شايله هو نفسه اللي بيقربك من نسخه منك أقوى أصدق أرقى وأعمق نسخه محدش يقدر يقلدها ولا ياخد مكانها نسخه اتشكلت من تعبك ودموعك وصلابتك وإصرارك نسخه اتولدت من قلب اتحمل فوق طاقته بس ما انكسرش للأبد لانك مهما وقعت هتقوم ومهما اتألمت
هتتعافى ومهما ات وجعت هتعرف في الآخر إنك كنت طول الوقت بتتبني مش بتتهد
