جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
كتب أحمد نجاح البعلي
حوار صحفي مع الدكتورة ريم مصطفى
يسرنا اليوم أن نقدم لكم لقاءاً خاصاً مع الدكتورة ريم مصطفى وكيل وزارة الصحة بمحافظة الإسماعيلية، والتي تعتبر من الشخصيات البارزة في مجال الرعاية الصحية بمصر. تميزت الدكتورة ريم مصطفى بمساهماتها البارزة في تحسين الخدمات الصحية وتطوير البنية التحتية للمستشفيات والمراكز الصحية بالمحافظة.
# دور الدكتورة ريم مصطفى في تطوير القطاع الصحي
تلعب الدكتورة ريم مصطفى دوراً محورياً في قيادة الجهود المبذولة لتعزيز مستوى الرعاية الصحية وتوفير الخدمات الطبية للمواطنين بشكل متكامل. تعمل بلا كلل على إحداث تغييرات إيجابية، من خلال التركيز على تطوير الكوادر الطبية وتحسين جودة الخدمات المقدمة.
خلال لقائنا معها، سنتناول العديد من المواضيع الهامة منها:
– **التحديات التي تواجه القطاع الصحي في الإسماعيلية**
– **الاستراتيجيات المتبعة لتحسين الخدمات الصحية**
– **أهمية التعاون بين القطاعين العام والخاص في تعزيز الرعاية الصحية**
– **الخطط المستقبلية لتطوير الخدمات الطبية بالمحافظة**
– **افتتاح مستشفى التل الكبير**
نأمل أن يوفر هذا الحوار نظرة عميقة وشاملة حول الجهود المبذولة لتحسين الخدمات الصحية في الإسماعيلية، وكيفية التصدي للتحديات التي تواجه هذا القطاع الحيوي. في البداية نرحب بالدكتورة ريم مصطفى ونتطلع للاستماع إلى رؤيتها وأفكارها التي تسعى من خلالها إلى تحقيق نقلة نوعية في قطاع الصحة.
*بسم الله الرحمن الرحيم*
في البداية نرحب بالدكتورة ريم مصطفى وكيل وزارة الصحة بالإسماعيلية وطبعاً بنقدم لها كل الشكر والتحيه والتقدير وبنقول لها ألف مبروك على تجديد الثقه كوكيلة لوزارة الصحة بالإسماعيلية ألف مبروك يا دكتورة ريم الله يبارك في حضرتك إن شاء الله حضرتك قدها وطبعاً بنشكر الدكتور خالد عبد الغفار لأن حضرتك تستحقيها وتستحقي أكثر من كده كمان بإذن الله تعالى
ميرسي يا فندم لحضرتك ميرسي جدا الله يبارك في حضرتك
*أحمد البعلي*
ما هي أبرز التحديات التي تواجه الخدمات الصحية في محافظة الإسماعيلية ؟
*د. ريم مصطفى*
الحمد لله مش هاقدر أقول في تحديات كبيرة لكن أكبر تحدي ممكن يقابلني إن أنا أقنع الناس أو المواطنين أو إن المواطن الإسماعيلاوي إن هو يتأكد إن الخدمة الوقائية والعلاجية بيسيروا في نفس الوقت في نفس الطريق بطريقة متوازية جداً ليه الناس ممكن أي حد فينا أو أي مواطن يسيب نفسه لغاية لما يبقى مضطر إن هو يدخل المستشفى في حاجة ممكن يبقى بيكابر وما بيحبش يعمل فحص دوري تشيك أب فبالتالي أنت بتضطر تذهب للمستشفى دلوقتي هو بيتعب تعب بيضطر يدخل المستشفى فوراً وفي نفس الوقت الدولة بتلاقي نفسها قدام المواطن وهو تعبان وفي حالة صعبة لكن أنا عشان كده بشجع وده التحدي بالنسبة لنا جدا إن أنا أقنع المواطنين لعمل تشيك أب كمان هتكلم عن المبادرات بس بعدين أثناء وجود فرق طبية ومبادرات إزاي الناس يعرفوا أهمية الإكتشاف المبكر إن الإنسان يعمل تشيك أب بيلاقي فريق موجود في كل مكان دلوقتي الحمد لله بنبقى متواجدين في أكثر المناسبات في الكنائس والمساجد على قد ما نقدر والقوافل الطبية إن هو ما يترددش إن هو يحاول يكشف ويطمن على نفسه كل ما أكتشف المرض بدري كل ما هو وفر على نفسه مشاوير المستشفى وإن الموضوع بيبقى أصعب وكمان عايزه أقول لحضرتك على حاجه هو ان جنيه يتم صرفه في إجراء فحص وقائي بيوفر قدامه آلاف الجنيهات كخدمة علاجية بعد التعب ممكن توصل لعمليات أو عناية مركزة لا قدر الله ده بالنسبه للتحدي
كمان التحدي إن فكر الناس يبقى مقتنع جدا بأهمية حفاظه على نفسه قبل المرض كمان عشان ما يتعرضش للمرض وده أكبر تحدي إن شاء الله هناك المبادرات والتوعية الثقافية ومنصات التواصل الإجتماعي ودي أكتر الحاجات اللي بنحاول على قد ما نقدر دلوقتي إنها توعي الناس وتشتغل على النقطة دي .
*أحمد البعلي*
كيف يتم تقييم مستوى الخدمة الصحية المقدمة للمواطنين في الوقت الحالي داخل محافظة الإسماعيلية ؟
*د. ريم مصطفى*
قصدك إن المواطن يبقى راضي إزاي
أولا إحنا عندنا دلوقتي في فرق تكونت في المستشفيات والوحدات بناء على تعليمات دكتور خالد عبد الغفار أسسها فريق خدمة المواطنين الفريق ده منوط بيه استقبال أي شكوى إن هو يدل المواطن لو في أي حاجة محتاجها هو في عملنا زي استبيان كده من ضمن الفريق مرور المديرية سواء مرور على رعاية أو مرور على مستشفى أو مرور على منشأه بتقدم خدمة كفريق إشراف اللي هو تابع للمديرية بياخد أرقام الناس اللي تعاملها مع المنشآت الصحية وكمان بيسألهم لو هو راح لقى في مواطنين بيسألهم رضاكم عن الخدمة إيه اللي تعطل عند حضرتك قعدت في الإنتظار قد إيه إن انت تدخل تكشف أخذت علاجك كامل ولا في مشكلة فدي من ضمن الحاجات اللي إحنا بنعمل لها زي سيرفي كده إن احنا نعرف رضا المواطن هل راضي عن الخدمة ولا لأ
من ضمن الحاجات الثانية اللي حضرتك بتقول أعرف إزاي هو استفاد ازاي هقول لك على حاجه مهمه جدا إحنا من ضمن المحافظات اللي فيها إقبال على المنشآت الصحية يعني أنا شايفه إن المواطن دخل منشأة صحية حكومية واثق إن خدمته هتتقدم هو ده بالنسبه لي كثير إن هو راضي عن الخدمة الحكومية فبالتالي هاييجي تاني عشان كده هو لو مش راضي عن الخدمة مش هاييجي تاني .
*أحمد البعلي*
ما هي الخطط المستقبلية التي تستعد الوزارة لتنفيذها لتحسين الخدمات الصحية داخل مديرية الصحية بالإسماعيلية ؟
*د. ريم مصطفى*
بص يا فندم الوزارة بتشتغل على كذا محور مهمين جداً لتحسين تقديم الخدمة
أول حاجة لو تتكلم عن تحسين البنية التحتية اللواء أكرم محمد جلال قال أهم حاجة عندنا المواطن الغلبان لازم الرعاية الصحية توصل له في كل مكان ومن ضمن الحاجات اللي فيها تحول كبير جداً في تحسين تقديم الخدمة هي المبادرات بطريقة كبيرة جداً أو تواجد الفرق الطبية والمبادرات في كل مكان علشان تلبي احتياجات المواطن فبالتالي ده بيحسن الخدمة للمواطن
مبادرة 100 يوم صحة وهي من المبادرات الرئاسية المكثفة في 100 يوم أثناء الإجازة الصيفية للطلبة وأهاليهم
تواجدنا في مراكز الشباب وتواجدنا في المنتزهات والكنائس والمساجد ودا خلى الناس تحس إن فريق وزارة الصحة فريق قريب جداً من حضرتك ساعات كتير بروح الأماكن ألاقي حد بيقول لي يا فندم فاكره أنا حضرتك كنت بتعدي تفتشي وانا كنت بقيس الضغط ده بيحصل دايما القافلة العلاجية اللي فيها اهتمام يعني زايد من الدكتور خالد عبد الغفار واللواء أكرم محمد جلال المحافظ يعني حقيقي الإثنين دول مؤمنين جداً بأهمية دور القوافل في الأماكن البعيدة عن الخدمة والأماكن الأكثر احتياجا ودي من ضمن الحاجات اللي بتحسن الخدمة الصحية للمواطنين التوعية الصحية والثقافية دي من ضمن الحاجات اللي إحنا بنركز عليها إن إحنا بنبقى إزاي وقد إيه قريبين من الناس حضرتك النهارده عملنا ندوه عن التثقيف الصحي إحنا بنعمل أدوات كتير انا عندي الفريق بتاع الإعلام بتاع الثقافة الصحية مش قادره أقول لحضرتك نقط كتير والرسائل بيعملوها بطريقه كبيره جدا وطريقه متنوعه بيوصلوا للناس بطريقه حلوه جدا وليهم طرق القاء وانهم يقنعوا الناس بطريقه كويسه جدا عند حضرتك كمان إدارة تنمية الأسرة بنهتم بالمواطن قبل ما يجي يعني ايه حضرتك قبل ما يجي يكشف مثلا لا حضرتك قبل ما يجي للحياه زي متابعة الحمل عندك ال 1000 يوم الذهبية يعني بيتابع الطفل من أول يوم في بطن مامته لعند لما بيتم 1000 يوم دي مبادرة مستحدثه نعم المبادرة الذهبية المستحدثة جديده كمان تتفق مع التنميه البشريه انت بتبتدي مع المواطن وهو جنين تشوف صحتهم صحه الأم هل الأم بتتغذى كويس علشان خاطر الجنين هل هي محافظة على التباعد بين الطفل الأول والثاني علشان صحتها علشان الجنين كل ده تحسين خدمات صحيه مقدمه للمواطن تخيل حضرتك بتخدم المواطن قبل ما يجي اصلا حاجات جديده والمواطن شايفها على أرض الواقع.
*أحمد البعلي*
كيف يمكن تعزيز التعاون بين وزارة الصحة والتربية والتعليم لتحقيق الأهداف الصحيه وأقرب مثال على ذلك التعاون بين وزارة الصحة ومديرية التربية والتعليم والقوافل الطبية ؟
*د. ريم مصطفى*
من أهم الخطوات اللي عندنا الشراكات بين مع المجتمع المدني والقطاعات الأخرى والقطاعات التنفيذية الأخرى مع الدولة ده مهم جدا واللي بدأناه من السنه اللي فاتت مبادرة بداية اللي كانت مبادرة رائعة حتى دخلت كل مكان وزارة شغاله لوحدها ده انا شايفاها ملحمه يعني بجد انت دلوقتي موجود في المكان وتديه خدمتك والولد بيلعب رياضه ومكتبه مصر العامه الولاد اللي بيحبوا القرايه في الخيمه بتاعة بتاعتهم بيقرأوا وتضامن بتؤدي دورها في تمكين المرأة وإن أي شخص من غير القادرين إنه يقدم واحنا موجودين فعلا كله شغال عشان خاطر اللي داخل القافله راجل او ست يلاقي كل حاجه يبقى الست بتكشف وابنها بيقرأ الست بتكشف وابنها بيلون أو يلعب رياضه جوزها ممكن يكون في اسمه تشغيل الشباب في حاجه اسمها تشغيل الشباب تبعين للمحافظه يبقى موجود عشان لو في شغل مثلا او ارزقي او لو في فرص عمل حضرتك متخيل طبعا مش بتبقى كل مره بس بنقوم بالتنسيق على مرات كثيره متقاربه ان احنا حابين من اول يوم تدشين لمبادره 100 يوم صحة يكون من داخل التربية والتعليم .
*أحمد البعلي*
حضرتك هتكلميني عن الإجراءات المتخذة لضمان توفير الأدوية والمستلزمات الطبية بشكل مستمر ؟
*د. ريم مصطفى*
بصي يا فندم الحاجات اللوجستية اللي هي توفير الأدوية والمستلزمات إحنا المفروض هي قبل السنة المالية بتبقى في احتياجات كل الإدارات وكل الوحدات والمستشفيات بتعمل احتياجاتها والإدارات المعنية بتخاطب هيئة الشراء الموحد ويعملوا أوامر توريدهم وفي طبعاً الصيادلة وأمناء المستلزمات بيبقوا وعارفين إن أول ما الرصيد والمخزون بيوصل لحد معين يبدأوا يطلبوا ثاني عشان ما يحصلش أي نقص على قد ما نقدر.
*أحمد البعلي*
إزاي بيتم تدريب الكوادر الطبية في المستشفيات في المحافظة على ضمان تقديم خدمات صحية عالية الجودة؟
*د. ريم مصطفى*
من القطاعات الصحية المهمة جداً في الوزارة قطاع تنمية المهن الطبية بصراحه مش قادرة أقول لحضرتك كمية التنوع والتدريبات اللي بتحصل عليها الكوادر الطبية والغير طبية كبيرة وبقى حاجات كثير جدا حضرتك بنتكلم في فني أطباء صيادلة أسنان علاج طبيعي كل الفنيين تسجيل الإحصاء فنين اشعه بياخدوا تدريب هم وغير الفنيين كمان بقينا بندرب الناس في دورات تدريبية جميلة جداً Ai الذكاء الإصطناعي بقى عندك تديهم كمان قيادة وإدارة تديهم إزاي التفكير المنطقي تديهم إزاي دورة في إتخاذ القرارات في التواصل إحنا دلوقتي في عالم ديناميك عالم متحرك جداً لو كل واحد شغال مع نفسه ما فيش تواصل أو ما عندوش مهارات للتواصل مع زمايله مع رؤسائه مع مرؤوسيه مع جهات أخرى مش هيعرف يتقدم فبالتالي بقى لازم التطور في الدورات في التدريبية اللي بتتقدم للموظفين سواء كانت طبي أو غير طبي من ضمنها بصراحه مهارات الإدارة حل المشكلات بصراحه حل مشكلات حلوه جدا بتنفع الناس كشغل إداري أو حتى مش إداري حضرتك حتى لو عندك مهارات إتخاذ القرارات انت فني ممكن يبقى عندك انت محتار بين قرارين فنيا فيعرفها ازاي لكن انت بتتجه لاتخاذ القرار ده طبعاً ده بيعود بالنفع على المواطن.
*أحمد البعلي*
ما هي أهمية التوعية الصحية لدى المواطنين لتحسين الصحة العامة ؟
*د. ريم مصطفى*
دلوقتي من الحاجات المهمة جداً التوعية الصحية التغذية السليمة وإدارة الإعلام والثقافة الصحية أطفال بيعملوا توعية للأطفال في الأكل الصحي والأكل الغير صحي والنظافة الشخصية إزاي أحافظ على نفسي من الأمراض المعدية إزاي أحافظ على أهلي كان في مرة واحدة ست قابلتني قالت لي أنا بشكركم جدا أنا أول مرة كنت بعمل تصرف خطأ وابني قال لي لا النهار ده حضر لنا ناس من وزارة الصحة في المدرسة وقالوا إن إحنا بنعمل كذا وكذا وكذا فبتقول لي أنا بشكرك الحاجه دي كانت تايهه عني بس أنا باشكر حضرتك جدا وباشكر الفريق بتاع حضرتك، التوعية الصحية لو مش موجودة الكلام ده مش هايوصل للناس المبادرات اللي موجودة في كل مكان معايا فريق إعلام وفريق ثقافة صحية بحيث إن المواطن اللي بيدخل يعمل كشف مبكر عن الأمراض أيا كان إيه هو لو ابنه معاه هيثقفوه لو مراته معاه هيقولوا لها هتعملي ايه تغذية لو هو كمان تعملي ايه بالنسبه للتغذية تعمل ايه هو كمان نقول له يحافظ على نفسه إزاي دي من ضمن الحاجات المهمة جداً جداً كمان الدكتور خالد عبد الغفار يؤكد على الكلام ده واللواء أكرم محمد جلال محافظ الإسماعيلية بيهتموا بيها جدا واللواء أكرم على فكره من أهم الأسئلة اللي بيسالها في القوافل لما بيروح القوافل للتثقيف الصحي بيقول لهم انتوا اتكلمتوا في إيه النهارده مع الأطفال والأسرة بجد ده حقيقي مهتم جدا .
*أحمد البعلي*
هل يوجد مشاريع جديدة قيد التنفيذ لتحسين البنية التحتية للمستشفيات والمراكز والوحدات الصحية داخل محافظة الإسماعيلية ؟
*د. ريم مصطفى*
نحن حالياً على مشارف افتتاح مستشفى التل الكبير اللي شارفنا بزيارته الدكتور خالد عبد الغفار وزير الصحة ونائب رئيس الوزراء واللواء أكرم جلال محافظ الإسماعيلية إحنا دلوقتي جالي الفرش وإن شاء الله في خبر قريب إن شاء الله يبقى يتم افتتاحها وكمان مستشفى أبو صوير برضه من ضمن المستشفيات اللي حالياً تحت التطوير وتحت الإنشاء أصلا هي لم تكن موجودة ودي من ضمن الحاجات اللي برضه زي ما حضرتك عارف إن مركز أبو صوير هو مركز هو أكبر المراكز في الكثافة السكانية في الإسماعيلية فالمستشفى دي برضه هتبقى نقطة تحول حلوه جداً لمواطنين أبو صوير في 6 وحدات صحية لسه تحت التطوير إن شاء الله بإذن الله في تطوير لهم ويبقوا من ضمن الحاجات اللي هيدخلوا برضه التأمين الصحي الشامل.
*أحمد البعلي*
إزاي بتتعامل مديرية الصحة مع شكاوي المواطنين المقدمة إليهم ؟
*د. ريم مصطفى*
طبعاً إحنا فاتحين باب الشكاوى لكذا مكان من كذا جهه عاملين الصفحة الرسمية للمديرية طبعاً الصفحة الرسمية للوزارة ممكن المواطن يبعت عليها فبالتالي الوزارة بتحولها في بوابة مجلس الوزراء بعد كده بوابة الشكاوي للمواطنين بيجي لنا دايما منها لو في شكاوى طبعاً
مكتب المحافظ أوقات بيروح لهم شكاوي برضه بتتحول لنا علشان نفحص فيها وزي ما قلت لحضرتك فريق خدمة المواطنين وفريق المديرية اللي بيمر على المنشآت بيسأل الناس في حد بيشتكي من حاجه كان فيه شكوى في الغسيل الكلوي كان الجو حار جداً والتكييف ما كانش شغال بكفاءة عالية فريق المديرية نزل صيانه و عمل التكييف وده إحنا اكتشفناه من خلال زيارتنا للمكان.
*أحمد البعلي*
هل يوجد متابعة لمدى الإستجابة للشكاوي ومدى القدرة على حلها ؟
*د. ريم مصطفى*
طبعاً في نسبة إنجاز بنتبعها كل شهر المشكلة اتحلت ولا معلقة ولا لم يتم حل المشكلة رئيس الوزراء والمتابعة بيشوفوا المواطن هل الموضوع اتحل ولا لأ .
*أحمد البعلي*
ما هي الخطوات التي تم اتخاذها لتسليم مستشفى التل الكبير التخصصي إلى فرع الهيئة العامة للتأمين الصحي بالإسماعيلية لبدء التشغيل التجريبي؟
*د. ريم مصطفى *
مستشفى التل الكبير هي منشأه صحية جاري فرشها وفي إنتظار قرار نقل تبعيتها من رئيس مجلس الوزراء لازم يظهر لها قرار الأول من رئاسة الوزراء
*أحمد البعلي*
على فكرة أنا سألت الدكتور علي رفعت في الكلام ده وقال لي إحنا فعلاً جاهزين لاستلام المستشفى والمديرية لم تنقل التبعية إلى الآن
*الدكتورة ريم*
المستشفى إحنا بنفرشها المفروض إحنا بنستلم من المقاول من الشركة المنفذة تم الاستلام في شهر 4/2025 بعد كدا بيبتدي الفرش يتورد طبي أو غير طبي فاحنا لغاية دلوقتي الفرش بيتورد تدريجياً فحتى الآن لم يتم الإنتهاء من الفرش يعني في الفرش وبعد الفرش في محطة الكلى محطة معالجة المياه بتتركب لها وصلات ولازم لها اختبارات والأشعة لازم الكلام ده كله يتم وبعد يتم نقل التبعية
العطله مش عندي عند الشركة بتخلص إجراءاتها ده أكيد قبل الزيارة وهو عنده علم بالاجراءات دي تاني حاجه قرار نقل التبعية يصدر من رئاسة الوزراء فاحنا في انتظاره وأول ما يوصل بعد التجهيزات في الفرش إن شاء الله تشتغل بإذن الله
*أحمد البعلي*
في رأيك قدامها قد إيه
*ريم مصطفى*
ما اقدرش أقول امتى لكن الدكتور خالد عبد الغفار أعطى لي تعليمات ب 60 يوم هو فعلاً قال كده من يوم الزياره 9/9 المده الزمنيه للتسليم لسه مش متحدده إلى الآن
إن شاء الله هيبقى فيها 96 سرير داخلي
و16 حضانة
و8 أطفال
و18 عناية مركزة
و31 سرير غسيل كلوي الأستاذ أحمد
ده التشغيل التجريبي التجريبي ولا النهائي
الدكنورة ريم
لا هايكون قسم الكلى والاستقبال والعيادات زي أي مستشفى ده اللي بيحصل في كل مكان حتى في القصاصين وغرب وشرق القنطرة.
*أحمد البعلي*
ما هي الرسالة التي تود أن تقدمها الدكتورة ريم مصطفى للمواطنين بشأن الخدمات الصحية في مدينة الإسماعيلية ؟
*د. ريم مصطفى *
يهتموا بالشغل الوقائي قبل العلاجي الكشف المبكر التردد على المبادرات الخاصة بالوزارة إن هم يعرفوا المرض بدري قبل فوات الأوان واهتموا بصحتكم واحنا موجودين دائماً في استقبالهم في المستشفيات.
خاتمة الحوار
وفي ختام هذا الحوار، أعربت الدكتورة ريم مصطفى عن تفاؤلها بمستقبل القطاع الصحي في الإسماعيلية، مشيرة إلى الجهود المستمرة لتحسين الخدمات الصحية وتطوير البنية التحتية للمستشفيات والمراكز الصحية. كما أكدت على أهمية التعاون بين جميع الجهات المعنية لتحقيق الأهداف المرجوة، والعمل بروح الفريق لمواجهة التحديات الصحية الحالية والمستقبلية.
كما أبدت الدكتورة ريم مصطفى استعدادها للاستماع إلى آراء المواطنين واقتراحاتهم، مؤكدة أن وزارة الصحة تعمل جاهدة لضمان تقديم أفضل الخدمات الصحية للجميع. وشكرت في النهاية جميع العاملين في القطاع الصحي على تفانيهم وإخلاصهم في أداء واجبهم، متمنية للجميع دوام الصحة والعافية.
بهذه الكلمات الختامية، نترككم مع أمل كبير في تحقيق المزيد من الإنجازات والتطورات في مجال الصحة العامة، سائلين الله أن يوفق الجميع لما فيه خير الوطن والمواطنين…
