ازاي أعلم طفلي آداب الحديث؟

الطفل مش بيتولد عارف يقول “من فضلك” أو “شكراً” أو يستنى دوره في الكلام، دي كلها مهارات لازم نعلّمهاله من بدري، وبشكل بسيط ومحبب.

المشكلة:

بعض الأطفال بيتكلموا بدون إذن، بيقاطعوا الكبار، بيرفعوا صوتهم أو ما بيعرفوش يعبّروا بطريقة مهذبة، وده ممكن يسبب مشاكل في المدرسة أو مع أصحابهم أو حتى في البيت.

الأسباب:

عدم التعرض لنموذج جيد في البيت.

ضعف في المهارات الاجتماعية أو اللغة.

التعود على التجاهل لما يتكلم فيحاول يثبت نفسه.

نقص في التوجيه أو التكرار.

الحل:

كوني أنتِ القدوة: الأطفال بيقلدوا، فلو شافك بتتكلمي باحترام وهدوء هيعمل زيك.

التدريب اليومي: خصصي وقت بسيط كل يوم نلعب فيه تمثيل أدوار زي “أنا وأنت بنتكلم مع صاحبنا” ونتدرب على الكلام المهذب.

علّميه عبارات أساسية: زي “لو سمحت”، “ممكن أتكلم؟”، “أنا آسف”، وامدحيه لما يستخدمهم.

قصي عليه قصص فيها شخصيات بتحترم الحوار وازاي ده ساعدهم.

ما تقاطعهوش وهو بيتكلم: علشان يحس إن ليه قيمة وإن اللي بيقوله مهم.

ثبّتي القواعد بهدوء: “لما حد بيتكلم، بنستنى دورنا”، وكرريها بدون عصبية.

شجعيه باستمرار: أي تحسن بسيط امدحيه عليه، ده بيحفّزه يكمل.

دمتم بخير وسعاده

نجلاء بدر