الشوق حريق

الشوق حريق
بقلم رجب أبو الحسن

مفتقد
حتى الخناق
حتى الزعيق
أوم تسألي عن اشتياق؟
الشوق حريق

احلف بمين رفع السماء
أنا البريء

ما كنت قاصد أعشقك
ولا كان بإيدي أموت كده
قلبي المهزأ صدقك
بقيتي ليا منفضة؟
يا نازلة فيا مخمضة

طيب تمام
كان ذنبي ايه أسهر ما انام

بتنامي فوق عشر ساعات
وأطلب يقولوا مش هنا
أرن تاني يقولوا جات
أفرح أنا

طب كلموها
نادوا عليها لو سمحتوا
أصبر أنا فاسمع أبوها
محظوظ يا بختو

بيشوف حياتي وشها
الحلوة طعمة
سامع يوماتي شدوها
ولا صان دي نعمة

مين متصل؟
وينه القمر غايب ما جاش
مجنون وإيه نازل غزل
ولا اختشاش

ويقفل قوام
طيب تمام
لا عارف أنام
ولا عارف أكلم القمر
ملعون أبو اللي اسمه الغرام
على السهر
طب أنتحر؟
كفر وحرام

النوم سلك
والليل حلك
وعايش شكك
طب اعمل ايه؟ ايه العمل؟
سلكت له كل السكك
مش لاقي حل ولا أمل

.