غذاء العقول .. اهم من غذاء البطون

بقلم /  مصطفي العموري

سياده الرئيس حضرتك قولت عايز معارضه بناءه ، تساعدني وتقدم مقترحات وحلول بناء ،علي ذلك رجاء من المسئولين اسمعو الراي الاخر ، وصوت العقل من المتخصصين ..

وكمتخصص اناشد الجميع  .. واول من اناشد الساده المدرسين والاساتذه فى الجامعات ثم الباحثين وكل المهتمين بالتعليم  .. واناشد الساده نواب مجلسي الشيوخ و البرلمان  .. و اناشد الجميع سواء ولي امر او مهتم ، ان يقوم كل  بدوره بالتعبير عن رأيه بأي طريقه ممكنه  ومحاوله توصيل صوتنا  عن رفض موضوع الوجبه المدرسيه واليكم السبب ..

ببساطه لما يبقي عندنا وجبه تمنها  15 جنيه في اليوم الواحد لكل طالب كما أعلنت الحكومه يبقي هنحتاج مليارات سنويا والحكومه اعلنت ان التكلفه لهذا العام هتكون حوالي  ٧،٧  مليار   مع ان المبلغ هيتعدي ذلك بكثير لو قمنا بعمليه حسابيه بسيطه بضرب عدد الطلاب × ١٥ جنيه × ٥ ايام اسبوعيا × ٦ اشهر سنويا . لكن هنعتبر المبلغ كما اعلنت الحكومه فمن يا تري هم المستفيدين  من ذلك المبلغ … المستفيد الاول يا ساده عمره ما هيكون الطالب .

.. اول المسفيدين هم اصحاب المصانع  (  المواد الغذائيه ) اللي هتصنع الوجبه وتغلفها ومليش دعوه ان كانت المصانع دي تابعه للدوله   ولا لأي جهه    ولا قطاع خاص .. ثانيا الموردين والمتعهدين .. ثم المسؤلين عن النقل والتوزيع  والمسؤلين عن مراقبه الجوده وكمان التخزين  ومتابعه الامر من الصحه ومسؤل التغذيه والعهده  وليله كبيره سعادتك .. ثم من بعدهم نأتي لبعض المسؤلين والمديرين ممن سيقومو بتسويه الاوراق التي علي اساسها ستستف الفواتير  ومن سيقومون بتسويه المستندات  والارقام  ومطابقه الاعداد في الحسابات حتي لو الطلبه مكنوش بيحضرو او غايبين المهم نقفل الاوراق صح .

.. وبعد كل ده عمرك م هتقدر تراقب جوده وصلاحيه الوجبه ع مستوي الجمهوريه يوميا ومهما تحرص هيحدث غش وتلاعب وكل يوم والتاني هتلاقي ف مكان ما حالات تسمم وذعر وقلق وخوف من اولياء الامور والاهالي  فبلاش نفتح هذا الباب من الاساس .

لذلك أناشد الجميع  خاصه من هم مسئولين ان يوصلو اصواتنا الي  سيادة الرئيس لاتخاذ قرار نهائي بالعدول عن هذا الامر .. ووضع هذه الاموال  والنقود  طالما انها متاحه او متوفره  في تطوير التعليم وجودته والارتقاء به .. وهو ده الشئ اللي هيكون ليه مردود اكبر ع عيالنا  وع مستقبلهم  ومستقبل البلد دي  .

غذاء العقول اولي وافيد من غذاء البطون .. بالمبلغ ده يا ساده .. نقدر نبني مدارس ونقضي ع مشكله التكدس والكثافه فى الفصول .. نقدر نبني مدارس محرومه منها اماكن كتير ونوفر ع الطلبه السفر والشحططه وع اهاليهم المصاريف والقلق على عيالهم من المسافات والطريق والمواصلات .

نقدر نمد المدارس اولا ب الاثاث اللازم بدلا من المتهالك  ثم  باحدث الوسائل التعليميه ونطور ونزود ونشغل المعامل اللي ف المدارس .

.. ونغير الكتب والمناهج والطبعات والمواضيع ونراجع كل حاجه ع يد خبراء ومتخصصين ونوزع التابلت ع الجميع وعليه الشرح والمواقع التعليميه والمنصات  بدون م نربطه ب الامتحانات خالص  بمعني يبقي وسيله تكنولوجيه للعلم والاستفاده بجانب الكتاب والمنهج     فقط يكون كبديل للدروس الخصوصيه .

نقدر كمان نقوم بتعيين  او  بتثبت المدرسين المؤقتين والعاملين بعقود .. ونعين مدرسين من الخريجين ونسد العجز فى جميع المواد ..  ونحفز الاكفاء منهم ..

نقدر ندي المدرس مرتبه اللي يستحقه ويعيد له كرامته ووضعه  ،او حتي نساويه بالعاملين بقطاع البترول او الكعرباء  مش هنقول لا نيابه ولا حربيه ولا داخليه  بدل ما المدرس هو الموظف الوحيد ف الدوله اللي اساسي مرتبه واقف وثابت من 2014  وبدون سبب وبدون ان يدري لماذا ، وبيتاخد منه الضرايب والخصومات بحساب 2021  وبرضه ميعرفش ليه  وازاي   ..

والاهم نقدر ندخل اقسام جديده ف المدارس الفنيه تتماشي مع التكنولوجيا  والتقدم والتطور العالمي الحالي  وصناعه الرقائق والخلايا  الالكترونيه وخلافه  وتأسيس نوعيه جديده من المدارس   تلحق ب المصانع .. حسب احتياج السوق المحلي والعالمي الحالي  والمستقبلي .

نقدر  كمان نتشأ ورش داخليه بالمدارس الفنيه والميكانيكيه والصناعيه والتكنولوجيه  وننتدب متخصصين ودكاتره و  مهندسين لتدريب الطلبه والتدريس لهم   وبعد تأسيسها تكون ورش منتجه . ويبقي الطالب فعلا  اتعلم صح  ويبقي الخريج مطلوب داخل البلد وخارجعا  نقدر نغير والله من مستوي الطالب والمدرس والعمليه التعليميه  لو بس استثمرنا الاموال دي صح ..