المرونة النفسية من أهم عوامل النجاح اللي ممكن تمتلكها

بقلم الدكتورة : هدير سعيد

أخصائي نفسي وتعديل سلوك وعلاج إدمان 

المرونة النفسية من أهم عوامل النجاح اللي ممكن تمتلكها علشان بتخليك تتحكم في نفسك و تسيطر عليها، و بتمكنك من التأقلم مع التحديات و الصعوبات اللي بتواجهك خلال حياتك.

و بتقدر من خلالها الإنتقال لمرحلة الحلول من غير ما تتوقف في مرحلة لوم النفس و البكاء على اللبن المسكوب.

ده بيفتحلك طريق الوصول للأهداف و تحقيق النجاح.

المرونة النفسية تعتبر فرع من فروع علم النفس المعاصر عشان بتعكس درجة تفاعلنا الإيجابي مع المتاعب و الصدمات اللي بنتعرض لها في حياتنا.

علماء النفس مبيعتبروش المرونة النفسية سلوك فردي أو طابع مميز إنما شايفين إنها صفة يمكن إكتسابها و تعديلها بشكل دائم.

 و لما بتكتسب مهاراتها بتتعلم و بتكتسب خبرات من التحديات و الصعوبات و الضغوطات اللي بتمر بيها.

– ما هي الصفات اللي بتكون موجودة في الشخص اللي بيتحلى بالمرونة النفسية ؟

1- تقبل النقد و التعلم من الأخطاء و الإستماع إلى نصائح الغير و ملاحظاتهم مع المحاولة دائما للإستفادة من جميع الإنتقادات أياً كان مصدرها.

2- القدرة على إتخاذ القرار المناسب.

 و ده بيكون نتيجة الإحساس بالمسؤولية و ده بيخليه يدرس الموقف كويس و بعدها ياخد قرار ملائم بدون تردد.

3- الإتسام بروح المرح وإنه يكون صاحب شخصية قادرة على نشر الفرح في نفوس المحيطين بيه و بيخليهم دايماً يشوفو جانب إيجابي في حياتهم.

4- الإستقلال و التكيف الدائم مع النفس مع معرفة ما له و ما عليه.

5- القدرة على تكوين علاقات و التعامل الإجتماعي و العقلي و النفسي مع المحيطين و العلاقات دي بتكون صحية و سليمة و واضحة الحدود.

6- التسامح و ده بيكون بسبب قدرة المرونة النفسية على منح أصحابها قرار ترك المكابرة و العناد و الإصرار على الرأي و بيخليهم أكثر قدرة على الإعتذار عن الأخطاء.