101 % ثقة

بقلم رجب أبو الحسن

من كام يوم صدفة برضو، و كانت حقيقي صدفة حلوة جدا، و مفيدة كمان بالنسبة لي، اتفرجت على جزء من حلقة لبرنامج صاحبة السعادة اللي بتقدمه الكاتبة الفنانة إسعاد يونس كانت الحلقة مع الممثلة منى زكي، المهم مع إني مش من معحبي منى زكي، لكن شدني كلامها و هي بتحكي إزاي ابتدت علاقتها مع الفنان أحمد حلمي، اللي انا طبعا من أشد معجبيه، و إزاي كان بيحاول يجذب انتباهها بشتى الطرق، و عمل حاجات هو سماها بطولية و هو بيحكي نفس التفاصيل مع السيدة إسعاد يونس في حلقة سابقة – ده طبعا حسب كلام مقدمة البرنامج- المهم البطولات اللي قام بيهاأحمد حلمي – و ده طبعا طبقا لتسميته هو – ما قدرتش انها تجذب منى لدرجة ان فيه حاجات من اللي حكاها للسيدة إسعاد يونس ما قدرتش منى تفتكرها، إزاي ده ؟
من الحاجات دي إن مره تليفونها وقع ودهسته عربية، يعني تقريبا دغدغته، يعني خلاص راح، إلا إنه- اقصد أحمد حلمي- ارتدى ثوب البطولة و قدر ياخده يصلحه و يرجعه زي الاول، منى ما افتكرتش الكلام ده اللي السيدة إسعاد قالت عليه وصفين “فيلم هندي” و “مغامرة رهيبة” طبعا البعض منكم بيقول في سره إن الستات يكفرن العشير، يعني زي القطط تأكل و تنكر، لا مش كده و ده مش موضوعنا دلوقتي، السبب وضحته منى في جملتين تلاتة ، إلا انهم بيلخصوا الدور اللي المفروض الأب يلعبه في تربيته لبنته، قالت بالحرف الواحد : حب ببايا و اهتمامه بيا و العطاء اللي كان بيعملهولي خلاني مش أي حركة عبيطة يعملها شاب حاببني أو عايز يتعرف عليا كات بتأثر فيا….”
الرسالة لحضرتك اه انت ، ايوه انت الأب، بنتك سامعني؟ بنتك أنت اه أنت ابوها أنت المسئول عن خلق بنت واثقة من نفسها 101 % يعني ما شاء الله مقفلة كل الدرجات + درجة تميز، طب إزاي؟ حضرتك لازم تهتم ، تدي مش الفلوس يا عم ، لازم تمدح شكلها بتفاصيله، جمال وشها ، شعرها ، لبسها الشيك ، خليها تشبع اهتمام ، و حنية ، و ثناء على تصرفاتها ، و شكلها ، و تميزها الدراسي ، و ذكائها، و كلامها، كل كل حاجة، لأنك لو حرمتها من دول ، هتدور عليهم، مش معنى كلامي إن وقت الحزم مش مطلوب ، لا لما تعمل اللي فوق ده مش هتحتاج أصلا الحزم غير ف أضيق الحدود ، و تصبحوا على خير