? .. همسه عتاب للرجال والنساء ع حد سواء

? .. همسه عتاب للرجال والنساء ع حد سواء

.. رؤيه بقلم .. مصطفي العموري

? .. ١ . النساء .. ظلمتو ليه حبايبكم …. ؟؟؟؟

ايه يا ستات جرالكم ؟؟
هي المسلسلات التركي غيرتكم
وافلام السيما الهابطه اكلت دماغكم
والفيس والروايات الفاضيه شقلبت حالكم
نسيتو مين انتو ولا نسيتو روحكم .. !!

نسيتو تربيه وطباع بلادكم
نسيتو ان الحياء والخجل جزء من دينكم

عايزين ايه من ازواجكم … ؟؟؟
عايزينو رومانسي وعاطفي ويقعد ساعات يكلمكم
عايزينو شيك ويكون رشيق ويقول نكت تضحكم
عايزينو يطبطب وكمان يدلع ويكون فاضيلكم
وعيونه خضرا وشعره اصفر ويغازلكم
ويقعد تملي بس يمدح ف روعه جمالكم
وياريت كمان يسرح من نظره ف سحر عيونكم
يتوه اول م يلمح يادوب خيالكم
ويبقي شاعر علشان ينشد ويطرب اذانكم … !!

طب اسمعيني وافهمي وركزي كمان يا ستي ..

زوجك شرقي ومتربي وميعرفش ياختي يغني
زوجك راجل وبيحبك وميقدرش عنك يوم يستغني
لكنه مش استاذ كلام وميعرفش يهري ويرغي
افعاله بتقول كل الكلام ولمسه ايديه والله تكفي

وف وقت الخصام كفايه صبره لحد م تهدي
وف وقت الوءام والصفا نظرات عينيه بتقول وتحكي
ولو يوم مرضتي او تعبتي
شوفي قلقه شوفي حزنه شوفه همه وبدون م يبكي
شوفي حبه لبيته وعياله وشقاه وتعبه وبدون م يشكي

هو مبيعرفش يقول ويرغني او يغني لكن انتي حسي ..

قله كلامه وصمته قصايد يسمعها اللي فاهمه
بين شفايفه وع طرف لسانه عسل وشهد للي عارفه
مطلبش منكو تمدحوه
لكن واجب عليكو والله تعينوه
واجب عليكو ل هموم الدنيا تنسوه
حاولو انتو تحتووه
وشوفو النتيجه بس انتو بس تقدروه

كفايه انه هو بيقدر تعبكو
كفايه انه عارف قيمتكم
كفايه انه ميحبش يهينكم
ليل نهار كل همه مصلحتكم

كفايه انه يا ستي صاينكم
بيضلل عليكو ومش حارمكم
غيرته عليكم والله تكفي اكبر دليل ع رجولته
هو حارسكم وهو سندكم

بس هو م تعودش يقول
ولا انه يكون عيل خفيف فرفور
ولا فاضي يعزف ويدق الطبول
والدنيا والله ملياه هموم
ف بلاش تظلموه ب اتهامات وظنون
ده مستحمل كتير عشان خاطركم عشان راحتكم

ف متعيشوش الخيال
ومتصدقوش الاوهام
ولا تسمعوش لوساوس الشيطان
واحترسو وحرصو من شياطين الانس والجان

وشوفو اللي قبلنا اجيال واجيال
عاشو أحبه بدون قصايد عشق وغرام

ف اللي ميشغلش مخه واللي ميحمدش ربه
لا هيحس يوم بفضله ولا عمره هيشعر بنعمه
واللي بيشيل غيره ذنبه
هو اللي هيعيش ندمان و من غير كتر كلام
هو اكيد الخسران
ف بلاش نكد و كبر و عناد و بلاش خصام

ريحو بالكم وراعو ازواجكم ورجالتكم .. وعلشان خاطر عيالكم وخاطر بيوتكم وبرضه خاطركم .. افتحو قلوبكم .. ومتغمضوش عيونكم .. و اعرفو وافهمو طبع وطبيعه شريك حياتكم .
ربنا يهنيكم ويسعد يارب كل ايامكم ……

? .. الكلام المفيد وباختصار شديد … ..
.. .. فيه راجل مبيعرفش يظهر حنيته وحبه ليكي بالكلام او الدعم العاطفي لكن بيعرف يعبر عن حبه “بالأفعال” .. بإنه يوفرلك كل احتياجاتك .. ويلبي لك كل طلباتك ..
فيه راجل مبيعرفش يظهر خوفه وقلقه عليكي في فترة تعبك لكن هتلاقيه مهتم جدا يوفرلك ادويتك ويسألك حتي عن مواعيدها ويتابع صحتك باهتمام ..
فيه راجل مبيعرفش يعبر عن أسفه واعتذاره بشكل صريح لكن بيحاول يلطف الجو بينه وبينك ب احترام .. او يناغشك او ينكشك في الكلام ع حسب طبعه ولغته ..
فيه راجل بيكون محتاج جدا لدعمك وحضنك ووجودك لكن بيخاف يظهر احتياجه عشان ميحسش بالضعف قدامك ..

فيه راجل مبيقولش بحبك
لكن مبيقدرش يستغني عنك ..

…………..???? ………….

? .. ٢ . الرجال .. رفقا بالقوارير

طريقك لكسب الاحترام اربع
تجعلك ع القلوب تتربع
ستجد بهما احلي من الحب واروع
وحياه اصفي من ماء النهر واعذب
انهما كنز لك و ان اخطات لك تشفع ..
هم ….. ( الموده والامان والرحمه والاهتمام )
صدقني …. يجعلانك زوج وشريك حياه ولا اروع …!!

….. ف اسمعني وافهم يا كبير ..
ف انهو عرف وانهي دين ..
سمعت انهم عندك جواري ولا خدامين ..

اوعي تبقو ف الدنيا دي جبارين ..
دولا برضه ع اهاليهم غاليين ..
وسابوهم علشانكو ف قدرو يا بني ادمين ..
خليكو معاهم ولاد اصول متربيين و محترمين ..

ده اللي ميفهموش معني القوامه هم اللي ناقصين ..
القوامه يعني تبقو مشرفين وعليهم تبقو حنينين ..
وتشيلوهم من ع الارض شيل .. وتطبطبو عليهم وانتو راضيين .. بالشمال وباليمين .. والمحبه بتبان .. بلمسه يد .. او بوسه خد .. او ابتسامه و نظره عين .. بس انتو تكونو مع بعض طبيعين .. وتعرفو انها حياه مش حرب ولا سباق ف انتو الاتنين عادي تبقو منتصرين وفايزين .. وتحاولو لاختلاف طباعكم تكونو متقبلين .. وعنهم يا رجاله انتو اللي مسؤلين ..

وف حقوقهم حاولو متكونوش مقصرين ..

مش الماديه وبس .. و المعنويه .. خليكو فاهمين ..
ولكلامهم ونظراتهم واحساسهم تبقو متابعين و مركزين ..
شركاء ف الحياه يعني زيكم والله تعبانين وشقانين ..
ومعاكو ف الهم شايلين ومستحملين ..

وف ايام الخير والهنا يبقو زيكم م السعاده طايرين ..
ومش شرط كتير .. بيرضو والله باقل القليل ..
اوعي تخلوهم ف الحزن مدعوين وف الفرح منسيين ..
اكسبوهم بالاهتمام والموده والرحمه و اللطف واللين ..
ان خلتوهم اميرات هيخلوكم سلاطين ..

وخليك عارف انه لو قل يوم ذكرك ونطقها لأسمك ..
ده يبقي معناه يا سيدي راجع نفسك ..

معناه انك نسيت تعاملها زي بنتك وامك واختك ..
نسيت انك هتسال عليها لانها امانه ف رقبتك ..
ومش انا اللي هعلمك ولا اقولك ..
بالراحه وواحده واحده دي برضه ف الدنيا سندك ..

ان بكت يوم يبقي ع طول عاملها ذي م تكون بنتك ..
وتجر واطي وتمسح دموعها بيدك ..
وسيب يا عم شويه من حقك ..
ده مش هيقل منك .. لا .. هيزود والله غلاوتك ..
وان لقيتها مخنوقه تعاملها كانها صاحبتك و صديقتك ..
وخليها تتكلم واسمع كانك الشاطر حسن وهي اميرتك ..
ولو غلطت يوم قومها زي الطفله .. وريها ياعم طيبتك ..
وتكون موجود لما تحتاجلك ..
.. لان ساعتها بيبان اصلك ..

وازعل واصطلح جوا بيتك .. ميسمعش ابدا حد صوتك ولا يدخل .. لا حد من اهلها ولا من اهلك .. الاحسن تشغل مخك وتتكل ع نفسك .. كده انت بتلم ف الامور .. بدل م توسع وتفلت منك .. حافظ عليها وع نفسك .. وع كرامتها قدام كل الناس تاخد بالك و حذرك .. دي قيمتها والله من قيمتك ..

وياريت تقصر ف المشوار ..
وبلاش التسرع ف اي قرار ..
وبرضه بلاش استهتار ..
.. وتعرف ان البيوت اسرار .

متسمعش صوتك لحد .. حتي لأقرب جار ..
صاحبي وصاحبك ع القهوه وبعديها سلام يا شطار ..
والقعده بره البيت والسمر مش ليل ونهار ..
ومش عمال ع بطال وبلاش كتر اعذار ..
وبلاش كبر ولا تجبر ولا خيانه ولا غدر ولا لت وعجن وضغط وتكرار .. وهم وكابه وضيق خلق باستمرار ..

محدش فيكو والله عبد انتو الاتنين احرار .. وللبيوت حراس بلا ذل ولا هوان .. الكل للمنفعه و للمصلحه والخير خدام .. وبلاش الانانيه دور ع الصالح العام .. وبلاش برضه تتغر وابعد عن الشر والاشرار .. هونو ع بعض مراره الايام .. ومتبصش تحت رجليك بص دايما لقدام ..

وبرضه متبصش ابدا لغيرك .. او بره بيتك .. ومتصدقش الكلام .. ده الدنيا متخلاش من الالام .. ومحدش فيها مرتاح .. المهم الرضا والصبر اللي بيعدو الايام .. ويحلو كل الازمان .. ويخلوك تعشق المكان .. دي رحله قصيره ف خلوها حلوه قدر الامكان .. يعني باختصار .. صعب تبقي ملاك ف متبقاش شيطان ..
.. حاول بس تخليك انسان ..

و من حسن عشرتك هتلاقي قيمتك ومعزتك ووزنك ..
هتلاقي ف الدنيا سندك وحضن دايما يضمك ..
هتقيدلك صوابعها شمع وتشيل همك وتنسيك حزنك ..
وهتبقي كسبت ف الدنيا دي سعادتك وفرحك ..

عايز تبقي سي السيد يبقي مش باليد وطوله اللسان ..
بالحنيه والاخلاق و الافعال …. مش بس بالكلام ..
ومتشغلش عن بيتك خليه دايما محط الاهتمام ..
مش مهم الفلوس .. الاهم حسن تربيه العيال ..
وتصفي النفس والنيه وتدور دايما ع الحلال ..
هتكسب والله الاتنين الحب والمال ..

تحب بيتك وعيلتك هتلاقي نفسك ع الراس متشال ..
السعاده بأيدك تلاقيها ف بيتك مهياش صعبه المنال ..
بس انت تكون راجل بمعني الكلام ..
وخد سيدك وحبيبك و خير المرسلين امام و مثال ..
تكسب رضا ربك وتنول راحه البال ..

.. رفقا بالقوارير
.. ما اكرمهن الاكريم .. وما اهانهن الا لئيم ..

……………..???? …………….