كلمات الشاعر طه_على_الدين
يا بحر ليه
إلى_شهداء_غرقى_البرلس
يا بحر ليه غضبان علينا؟
د احنا صيادين غلابة
جينا نشكيلك اللى فينا
من بر مليان بالديابه
جينا نطرح فيك أمانينا
و إحنا راضيين بالهبابة
م احنا بيننا يا بحر عِشره
مشهور بكرمك و الطيابة
ليه بتقسي علينا فجأه
و العشم يقلب غرابه؟
عيشنا راضيين فرحانين
ليه الفرح يقلب كآبه؟
ليه طاوتنا فى دواماتك
و رقتك تقلب صلابه؟
الولاد كانوا مستنين..
نرجع منك مجبورين
زي م كانوا متعودين
و يفرحوا بقولة يا بابا
هيقولوا إيه يا بحر لأمى
لما يرجع خالى و عمى
من جثمان و لا حاجه منى؟
قوللى إزاى أمى هتتحمل
الله يصبر قلبك يا آبا
لو غدرك يا بحر رحمه
و رزق يعنى بالشهاده
أرجوك خلى فى قلب رحمه
و سيب لولادى العضمتين
عشان يصروهم فى قبر
جنب اخواتى الشقانين
يعنى تبقى حياتنا غُربة
و غُربة و احنا ميتين؟