يا ابو العروسه ليه كده .. !! ؟؟

بقلم / مصطفي العموري

يا ابو العروسه اسمعني .. وياريت متزعلش مني وتفهمني ..  ولعلمك انا زيك .. ويمكن سني قريب من سنك .. ومعلش هكلمك بالعاميه او بالبلدي علشان  يمكن حد تاني يقرا المقال و يراجع نفسه   ويتعلم ويستفيد مني ومنك .. بس ياريت  اصبر عليه واسمعني ..

بالنسبه للجهاز يا عم الحج

ايه حكايه عشر عربيات وعشرين عربيه والزيطه الكدابه دي  مع ان لا قدر الله لو بنتك زعلت او الامور باظت لا قدر الله   يمكن بترجع ف توك توك وحاجتها كلها علي عربيه واحده …

ومن اول م بتجهز   هو كل الناس أمكانيتها زي بعض علشان كل حاجه نجيبها بعدد زي بعض   وزي بت فلان وعلان .

يا عم هات الحاجه الكويسه والنضيفه ومتزعلش بنتك  بس حسب امكانياتك   مفيش حاجه اسمها بالعدد  والله محدش هيعد وراك  ده احنا اللي بنطلع ونصدق ونقول ونقلد ….

بالكلام اللي بنعمله ده ظلمنا بعض   وظلمنا ناس مش قادره وكسرنا بخاطر بنات محتاجه وكسرنا قلب البنات اللي ظروفها ع الكد وظروف اهاليها صعبه      وضيعنا اولياء امور كتير  بحجه انه عاوز يستر بنته و يستر قدام الناس ويجيب زي بنت فلان وعلان و يمشي ورا الكلام  ممكن يسجن او يداين أو يضيع   . مع ان ألي جه بيتك واتقدم لبنتك جالك انت مش جه ل فلان وعلان …

ومن البدايه لو انت انسان ف حالك وملكش دعوه بغيرك  و صريح والامور مفيهاش منظره وتنطيط  .. ولا تجبر الراجل اللي جايلك ولا تتجبره   كفايه انه يكون راجل وهيحافظ ع بنتك    ولا تجبره ولا يجبرك    وتيسر ولا تعسر  ..  هتمشي كل  الامور والله  زي الفل ..

دور لبنتك علي راجل يحافظ عليها ويسعدها  مش تدور ع المناظر والفلوس وممكن يعيش طول عمره حارمها وتعبها و يعيشو مقضينها مشاكل وخناق  بدلا من موده ورحمه واتفاق  …. كام واحد افتكر يسال خطيب بنته بتصلي ولا …  هو مش ضروري يكون شيخ    بس شرط يكون اخلاق  و يحافظ عليها    يكون بيفهم ف الاصول مش ف الفلوس    هو ده اللي هترتاح معاه حتي ف الحزن او المشاكل والزعل والخصام  لأنه بيفهم ف الحلال والحرام والصح والغلط  و الاصول ….

كل واحد يعمل اللي عليه ويجيب حسب مقدرته وحسب ظروفه       ملكش دعوه بحد    خليك ف روحك    وف مصلحتك   وراعي ظروف الناس      علشان بنتك تعيش مرتاحه    هي مش بيعه وشروه    ولا هي سلعه     دي سنه الحياه  ..  يسرو ولا تعسرو  ..   أبدءها بهدوان سر بدون تجبر  هتمشي زي الفل …. وربنا يوسع علي الناس كلها ….

? ..   وشوف معايه كده أكبر  تقليعه يا عم الحج

ليله الحنه  .. انت طبعا عمرك زي حلاتي  فوق الاربعين    يعني عارف انه لحد من 15 سنه فاتت   مكنش فيه ف بلدنا حاجه اسمها ليله حنه للعروسه ….. خارج البيت …. وانت حر يا عم  بس اسمعني    ممكن العريس يقول انا عايز افرح وأهيص انا واصحابي وابويا واخواتي    ولازم اعمل ليله حنه واعمل  واسوي     هتبقي مبلوعه و مقبوله  … لكن العروسه بنتي وبنتك هتنزل تفرح وتهيص هي وزميلاتها وسط الناس ولا وسط الشارع !! …. ولا هتكون جوا البيت  وتهيص وتفرح براحتها هي وزميلاتها و الاهل والجيران   وكل معازيمها وحبايبها وصحباتها ؟؟

… محدش قال متفرحش او تكسر بخاطرها  لكن زي زمان يهيصو ويفرحو جوا البيت    ونجيب ليهم كل اللي نفسهم فيه واكتر …. بس جوا البيت وسط زمايلها وحبايبها …. هي مش هتستفاد ولا هتفرح بالي انت هتعمله بعيد من غير متشوف منه حاجه .. ولا هتبقي حتي فاضيه تتفرج عليه ..

يبقي هتعمل ده لمين  للمنظره ولا ايه السبب يعني  ..  متزعلش مني ليله ملهاش اي ستين لازمه    وانت حر  ..

? .. ومن بعد يوم الفرح يا عم الحج

بنتك بقيت مسؤله من زوجها  وكلامه هو اللي يمشي وهو الراجل ف بيته وهو حر …. ياريت بلاش تدخل ف حياتهم انت أديت رسالتك   ….

ودورك دلوقت اتغير  انت بقيت مشرف  ..  مشرف فقط من بعيد ل بعيد بدون تدخل ولا تنمر ….

حتي لو زعلو  حاول تسيبهم يزعلو ويصطلحو جوه بيتهم بدون تدخل  ….  زي م هي بنتك لمصلحتها ومصلحتك اعتبره ابنك .. مش انت اخترت ووافقت  ده  ابنك نفسه ملكش يد تختاره او ترفضه …. لكن ده يعني كان حلو  ف الاول بس …. واوعي تحاول تكسره او تقله او تهينه او حتي تغلطه قدام بنتك  اوعي تعلمها تتجرأ عليه لا من وراه ولا من قدامه   ولو عايز تناقشه او تفهمه او تعاتبه او تلومه  يبقي بينك وبينه  وع جنب وبدون حضور احد  كانكم بتتكلمو ف حاجه سر  … وكل طرف فيهم تتعامل معاه بنفس الطريقه  وتحاول  تشوف اخطاؤه  وغلطاته  مش مميزاته  وتنقل م بينهم الكلمه الحلوه والوحشه تلوم عليها وتساويها وتنساها واوعي تنقلها  تعتبرها غلطه او زله لسان  ..

? .. وان اضطرتك الظروف وادخلت م بينهم يا سيدي  يبقي بالحسني  الاتنين بقيو ولادك تصلح وتساوي …. مش تتعالي او تتكبر أو تتجبر   دي حياه وعيشه مهياش حرب  …  وياريت سيبوهم يعيشو حياتهم  يجربو ويتعلمو  . .. .  وربنا هيجعل م بينهم …. موده ورحمه …. وده اللي هيسعدهم ويخليهم يعيشو  حياتهم    مش انا ولا انت والله …..

ولو عملت كده هتكسب ابن ليك   وهيعزك ويقدرك  ويشيل بنتك فوق راسه  لانه هيعرف انه ناسب راجل .. ف يحاول يردلك  الحسني ب الأحسن مع بنتك .. وربنا يوسع ع الناس كلها ويعين ويساعد ويفرح الجميع   .. اللهم أمين ..