جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج
بقلم ـ نشأت البسيوني
في مكان محدش بيوصل له غير اللي تعبوا من الدنيا واللي هربوا من الكلام والضوضاء والخذلان في آخر الأرض فيه وادي غريب وادي ما فيهوش بشر لكن مليان أرواح في حجارة واقفة زي الشهود الحجارة دي مش مجرد صخور دي كأنها قلوب اتحجرت من كتر ما شافت من زمان طويل وفضلت واقفة من غير ما تتكسر ولا تنهزم وادي الأحجار الصامتة ما فيهوش صوت ولا أنين ولا حتى نسمة
تعدي كل حاجة فيه ثابتة كأن الزمن وقف عند لحظة محدش عرف يتجاوزها كأن الوادي ده اتخلق مخصوص للروح اللي وقفت في نص الطريق ومش عارفة تكمل ولا ترجع والناس اللي بتوصل له ما بيوصلوش عشان يرتاحوا بيوصلوا عشان يتواجهوا مع نفسهم مع اللي خبوه مع اللي وجعهم مع اللي كسّرهم واللي تعبوا من الصبر ومن الجري وراء اللي مش ليهم واللي فهموا متأخر إن القلوب لو
اتأذت كتير بتسكت زي الوادي ده أول ما تدخل الوادي الجو يتغير تحس إن الهواء تقيل كأنه شايل أسرار ناس قبلك مشوا نفس الخطوات وشالوا نفس الهم ودفنوا وجعهم بين الحجارة وتشوف صخور واقفة في صفوف كأنها جنود تعبت من الحرب وما استسلمتش وتشوف صخور تانية مكسورة نصين كأن حد حاول يقاوم بس الوجع كان أكبر وتشوف صخور عليها شقوق رفيعة كأنها
دموع متحجرة من سنين طويلة والوادي بالرغم من صمته بيحكي كتير بيحكي إن الناس لازم تقف مرة واحدة في حياتها وقفة مصيرية يسألوا فيها نفسهم مين بيحبهم بجد ومين بيتمنى لهم الخير ومين استغلهم ومين استهلك قلبهم وراح وبيحكي إن الروح مهما اتكسرت بتفضل تدور على مكان يلم شتاتها حتى لو كان المكان ده وادي صامت مليان ذكريات ما تخصكش بس قريبة منك
كأنها حكايتك انت ولما توصل للنقطة الأعمق في الوادي تحس بحاجة غريبة تحس إن قلبك اللي اتخبط كتير بدأ ينبض بهدوء وإن روحك اللي اتعذبت بدأت تفهم إن الوجع مش نهاية وإن الصبر مش ضعف وإن الانهيار مش سقوط وإن أقوى لحظة في حياة أي إنسان هي اللحظة اللي يعرف فيها إنه عاش كتير من غير ما يحس بقيمته وإن اللي جه الوقت يرجع له حقه من نفسه قبل ما يرجعه من الدنيا
وفي آخر الوادي تلاقي صخرة ضخمة واقفة لوحدها ومكتوب عليها نقش قديم محدش عرف يقرأه بس لو قربت منها تحس إن الكلام بيتقال جواك مش بعينيك كأنه بيقولك ارجع وقف على رجليك افتح عينيك وشوف إنك لسه ما انتهيتش وشوف إنك لسه قادر تكمل وإن اللي لسه جاي أقوى من اللي راح وإنك مش محتاج غير توقف قدام نفسك وتعرف قيمتك وتخرج من وادي الأحجار
الصامتة شخص تاني شخص فاهم نفسه أكتر فاهم الدنيا أكتر فاهم إن الوجع مش نهاية وإن الطريق مهما كان طويل لازم يوم يفتح وباب مهما اتقفل لازم يتغيّر ومكان مهما كان مظلم لازم يطلع منه نور لو انت اللي بتحاول
