نفسي

بقلم : انتصار سليمان

يوم ما تحس انك زعلان

أو زهقان من كل الكون

ارسم وردة تكون دبلانه

حتي ان كانت من غير لون

ارسم ضحكة تكون بهتانه

ولو بالعافية ومعها سكون

جوه الضحكة اكتب اسمك

وارسم روحك لو تعبانة

ارسم قلب بيحضن قلب

ارسم ايد بتفــــــارق ايد

ارسم طفل وهوه بيعيط

محتاج لعبة في يوم العيد

وارسم جرح قديم متخيط

خرج منه في لحظة وليد

وارسم صورة فيها مودة

فيها الايد بتشد علي الايد

ارســــم أول حب قابلته

وصورة قلبك وهوه سعيد

ارسم باب مقفول ع الآخر

خلفه قلوب في الأصل حديد

ارسم لمة جميلة لعيلة

ملهاش مرة في يوم مواعيد

وارسم حمل تقيل متشال

يوم عن يوم يتقل ويزيد

ارسم بيت كان زحمة بناسه

وبعد سنين أصبح مهجور

ارســـــم حلم بقاله سنين

ياعيني عليه مستني الدور

ارســـــم آه وارسم دمعة

ارسم ضلمة في عز النور

ارسم قلب اتحمل يــــاما

لكن عمره ما كان مكسور

قصيدة نفسي بقلم انتصار سليمان