جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
نخلتين و واحة..
بقلم رجب أبو الحسن
نخلتين و واحة
وعشة والسكات ..
مش عايز كهربا..ولا أي تقنيات..
ومية ف زمزمية
في شوال من خيش..
وعيش..
على حبتين طماطم..
وجبنة يا ناس أريش..
وعلى الحشيش أبات..
نخلتين و واحة
وعشة والسكات..
مش عايز غير سكون..
وعصافير حواليا حايرة..
ده أنا حلمي في واحة أكون..
مش عايز غير بحيرة..
نفسي يموت التقدم..
ويعود عهد القمم..
ده اللي اسمه بناء بيهدم..
فينا أجمل قيم..
فينا أجمل حاجات..
نخلتين و واحة
و عشة و السكات
نفسي يا واحة أجي لك..
أحضن فيك الأناة..
يا تكنولوجيا جيلك..
سارق مني الحياة..
نفسي يبات الأمان..
جوه عيون الوداعة..
نفسي في ريحة زمان..
تخزي ريح الاصطناعة..
تغزل فينا اللي فات..
نخلتين و واحة
وعشة والسكات
مش عايز أي صوت..
يخرس همس الحنين..
مش عايز غير خفوت..
لضجيج الصاخبين..
مش عايز حاجة غير…
واحة والنخلتين..
على عشة والخرير..
وعصافير متحيرين..
وعبير في ضلوعي بات..
نخلتين و واحة
وعشة والسكات
