مشاكل القراء

..كتب سلامه الشرقاوي

انا هجوز جوزي تالت يوم العيد هجوزه واحده ارمله معاها عيلين والسبب اني مش بخلف وبقالنا ٥ سنين متجوزين وحكم عليا اني اشوفله عروسه ولاقيت ديه معرفه واحده صاحبتي وعاوزني اخد عيالها يعيشوا معايا اول سنه جواز علشان هو يبقى براحته وانا لو موافقتش مطلوب مني اشوفله واحده تاني غيرها بس لو معاها عيال نفس الشرط

وانا مش موافقه واهلي مش عاوزين يطلقوني لاني مش هعرف اتجوز تاني لاني داخله على الاربعين وانا قلبي مقهور ومضطره اني اوافق ومعرفش ايه اللي ممكن يحصل بعد كده تاني انا خلاص حددت الميعاد وشافوا بعض وهي موافقه ويكتبلها مؤخر كبير وهيجيب شبكه وكل طلباتها علشان تواقق تكون زوجه تانيه وترضى تخليني معاه وميطلقنيش انا غلط من الأول اني استحملت وكملت معاه رغم الذل والاهانة منه ومن اهله ومعيرتهم ليا اني مش بخلف

وانا والله بنت ناس ومتعلمه تعليم عالي بس اهلي مش عاوزيني اطلق وارجع تاني لانهم دماغهم اني اكون في ضل راجل احسن ما اكون مطلقه انا مش عارفه انا عاوزه ايه من كلامي ده بس معنديش حد يسمعني او حاسس بيا ومعاكم هنا من مده فقررت اكتب يمكن تدعولي ربنا يصبرني على اللي انا فيه وعارفه انكم هتحسو بيا واللي جوايا