محمد صلاح افضل لاعب بالعالم العربي
متابعة ستيرة عطيه
كتب الوكيل خيرت شكرى وكيل جهاز مباحث امن الدولة السابق يقول
كون محمد صلاح يبقى أحسن لاعب في العالم ، فده مجاش من فراغ ، لكن ده كان نتاج طبيعي لسلوك منضبط ، وبني أدم أشتغل على نفسه صح ، يعني من الأخر بعد عن ” الهلس ” ، وحافظ على جسمه وصحته ، علشان عنده هدف وطموح عايز يحققه … و بيحققه .
طبيعي علشان محمد صلاح يوصل للمكانة دي يبقى حياته بعيدة عن السهر و الخمر والمخدرات والنسوان الشمال ، وده مش كلام سر أو خفي على أحد ، ده السلوك الطبيعي لكل لاعب عمل لنفسه ولبلده تاريخ .
هل عمرو أديب مش عارف الكلام ده ؟ لأ عارفه ، وعارف إن اللاعب لما بيكون عالمي الصحافة مش حا تسيبه في حاله ودايماً بتبحث عن السبق الصحفي .
علشان كده عايز أسأل عمرو أديب ، ايه قيمة سؤالك عن علاقة صلاح بالخمور ؟ وأنت تعرف أن إجابته ممكن تسبب حملة صحفية مضادة عليه ، تسحب من رصيد محبه الناس ليه … ايه قيمة السؤال عليا كمشاهد ، ماهو طبيعي مش بيشرب خمرة ، أمال وصل للمكانة دي أزاي ؟ .
طيب هل أنت يا عمرو ” كمستخدم ” كنت حسن النية ومكنتش تقصد ؟ ، طبعا لأ مفيش إعلامي أو صحفي حسن النية ، وإلا يبقى فاشل في عمله .
الخلاصة عايز أقول انك في سؤالك لمحمد صلاح عن علاقته بالخمرة لم تكن حسن النية وسؤالك خبيث ، و بيخّدم على ناس تانية كان ليهم تصريحات عن المثلية ما عجبتش الصحافة الانجليزية والغربية وطالبين التحقيق معاه ، والغريب انك متكلمتش في الموضوع ده ، أو جبت سيرته بعد البروباجندا المفتعلة اللي عملتها من اسبوعين ضده ، وكانت حتعمل فتنة كروية في الشارع .
صلاح ثروة مصرية يا ريت نحافظ عليها يا عمرو وبلاش أسلوبك الخبيث .
قبل ما أنهي البوست عايز اسألك ليه دول الخليج وغيرها من الدول العربية والأفريقية لم تعطي صوتها لمحمد صلاح في مسابقة أختيار أحسن لاعب في العالم ، وليه أنت ما تكلمتش في الموضوع ده ؟ عارف ليه لأن ولي نعمتك معطاش صوته .