جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج
بقلم : نورا صلاح عبد الجليل
الحياة ما بترحمش اللي يستنى، ولا بتقف علشان خاطر حد، مهما كان غالي أو قريب.
ناس كتير ضيّعت سنين من عمرها وهي مستنية شخص يتغير،
مستنية دعم ييجي،
مستنية كلمة تطمّن،
أو حتى فرصة كان لازم تخلقها بإيدها مش تستناها.
لكن الحقيقة الواضحة إن الحياة بتمشي لقدّام،
واللي يقف مكانه، الزمن يعدّي عليه من غير ما يحس
ويفوق فجأة يلاقي نفسه خسر أحلامه، وطموحه، وثقته في نفسه.
كتير مننا بيغلط لما يخلي نجاحه مربوط بشخص
زوج، صديق، حبيب، مدير، أو حتى قريب.
نعلّق آمالنا عليهم وننسى إن أقوى سند لينا هو نفسنا بعد ربنا.
اللي عايزك في حياته، هيقف جنبك وإنت بتجري مش وإنت واقف.
واللي وجوده مش حقيقي، هيسيبك أول ما تحتاجه.
ساعتها لازم تختار:
تكمّل حياتك… ولا تفضل واقف عند نفس النقطة.
كمل طريقك حتى لو الطريق كان صعب،
حتى لو مفيش حد بيشجّعك،
حتى لو كل اللي حواليك شايفين إنك مش هتوصل.
النجاح مش محتاج تصديق الناس،
محتاج إيمانك أنت بنفسك.
افتكر دايمًا إن الفشل مش إنك تقع،
الفشل الحقيقي إنك تقف وتقول مش قادر.
كل محاولة فاشلة هي خطوة أقرب للنجاح،
وكل تعب له ثمن، حتى لو اتأخر.
ما تخليش خيبة أمل توقفك،
ولا خذلان يكسّرك،
ولا كلمة جارحة تهدّ حلمك.
اللي كسروك امبارح، ممكن يبقوا أول المندهشين بنجاحك بكرة.
نجاحك مش رد على حد،
ولا انتقام من حد،
نجاحك إثبات لنفسك إنك قدّها،
وإنك أقوى من الظروف، وأذكى من اليأس.
خليك فاكر إن ربنا ما بيضيعش تعب حد،
وإن كل خطوة بتاخدها بنية صادقة،
ربنا بيكتبها لك نور في طريقك حتى لو مش شايفه دلوقتي.
في الآخر، متوقفش حياتك على حد،
لأن اللي وقف حياته على غيره، خسر نفسه.
كمل طريقك، اجتهد، اسعى، ونجح،
وسيب اللي فات في مكانه…
لأن اللي جاي يستاهلك أكتر.
