ما فيش دونك

ما فيش دونك
و لا معنى
و لا استغنا
عنك ما فيش
بحبك حب ما يكفيش
نبات الأرض
لو يعني هيتوزع
بحبك حب متربع
ف قلب الطفل جوايا
و قلب جسور
بحبك رغم علو السور
و كونك في السما نجمة
و أنا عصفور
بحبك رغم كل الحسن بتحوزي
و أنا من أصل إفريقي
بحبك حب يكفيكي
سنين قدام
و مضروبة ف عشر أعوام
و حاصل ضربهم برضو
علامة في ×
و كمان عشرة
بحبك حب مش كسرة
و لا حاجة
و لا حرمان
و حبك فيا زي ما كان
و زيه الآن
بحبك أصل ما شوفتش
بني الإنسان
سوى فيكي
بحبك حب يسقيكي
ما يطفيكي
و تستاهليه
بحبك اه يا بنت الايه
يا قمراية
و نفسي تكوني ويايا
و هنا معايا
و جوايا
ده أنا جوه و برايا
غرامي يبان
بحبك أصل ما شوفتش
و لا ظني هناك في الجان
كده زيك
بحبك حب ما يعديه
سوى حسنك
سوى عيونك
و لا أجمل من الدقات
سوى لونك
و لا أحلى من الكلمات
سوى جنونك
و لا أطعم من التصاوير
سوى الشفة
بحبك حب من دجلة إلى الضفة
و للمغرب
بحبك حب متغلب
على العقبات
و أتقطع سبع حتات
و من سفح الجبال حبك
إلى القمة
و يكفي العشق كام أمة
بحبك حب ما أتسمى
و لا أسمى
يا ست الحور يا مبتسمة
فتتقتل قلوب و تموت
بحبك أد شحر التوت
و شجر التين
و كل الزرع في الدنيا
و سور الصين
و وسع القارة و القارة
سبع قارات
بحبك حب يستاهل
يبوس الإيد
حلال في العشق ده القبلات