جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
كلب بأصل… وناس بلا أصل!
كتب : هاني رفعت
بعد تجارب كتير في الحياة، الواحد لازم يعترف إن فيه دروس ماينفعش تتعلمها غير لما تربي كلب.
مش علشان كائن لطيف ومخلص بس، لأ… علشان تكتشف بنفسك الفرق بين الوفا الحقيقي والتمثيل البشري.
الكلب ممكن يعيش معاك سنين، بياكل من إيدك، ويجري عليك أول ما يشوفك، مهما غبت أو اتأخرت.
مايعرفش ينكر معروف، ومايعرفش يبيعك، ومايعرفش يتنكر في وشك.
الكلب مش بيطمر… بالعكس، ده اللي بيصون العِشرة حتى لو إنت نسيت.
لكن البني آدم؟
يوم تاكله على السفرة، وتاني يوم ياكل سيرتك في القعدة.
بياخد خيرك، ولما ييجي الجد، يلبس وشّ الملاك وهو اللي ماسك السكين في ضهرك.
وفي الآخر، يقولك بكل برود: “هو أنا كنت أعرفك منين؟”
الفرق الحقيقي إن الكلب مش بيغدر، ومش بيتكلم بظهرك بالكدب لما يزعل
ده الفرق بين وفاء بالفطرة وناس بتتعلم الخيانة بالخبرة.
