جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج
بقلم ـ نشـأت البسيـونـي
قلب بيصارع الحياة لوحده في وقت الناس فيه بتتغير أسرع من تغير الفصول وفي زمن بقى فيه الوفي غريب والمحترم مهمش والطيب متخانق مع نفسه كل يوم عشان يعيش وسط قلوب بتعرف تجرح بسهولة وتنسى بسهولة وتكسر من غير ما تحس بشيء وللأسف القلوب اللي شبه الورق هي أكتر قلوب بيقسو عليها الزمن لأنها بتصدق بسرعة بتحب بصدق وبتدي من غير حساب ولما
بتتاخد منها حاجة بتوجع قوي بتوجع للدرجة اللي تخلي الروح نفسها تخاف تتحرك في ناس بتعيش عمرها كله بين اتنين بين قلب بيتمنى حد يفهمه وبين عقل بيقوله خاف ما تثقش ما تفتحش بابك تاني ما تفرّطش في آخر الحنية اللي فضلالك وعمر القلوب بيضيع في النص بين خوف قديم وأمل جديد بين وجع متخزن وسؤال ما لهوش إجابة هو ليه كل اللي حبّيتهم كانوا بيجوا عشان ياخدوا
مش عشان يدو هو ليه كل اللي دخلوا حياتي سابوا علامة وجع مش ذكرى حلوة ليه الروح بقيت مش مصدقة حد حتى لو كان صادق وفي وسط الزحمة دي في قلب بيعيش في معاركه لوحده معركة الصبر ومعركة الذكريات ومعركة الحنين ومعركة مواجهة النفس كل ليلة معركة إنه يثبت لنفسه إنه لسه قادر يكمل رغم إن مفيش كتف يسند عليه ولا حد يسمعه بجد ولا حضن يرجع الروح
مكانها وأكتر لحظة بتوجع لما تلاقي نفسك عايز تحكي ومش لاقي حد تتطمن له ولا كلمة تخرج ولا دمعة تتهدى ولا صدر ترتاح عليه فتضطر تبلع وجعك كأنك مجرم وترجع تضحك عادي كأنك مش من جوه عيل جبال والقلب ده لما بيزعل ما بيزعلش من كلمة ولا من موقف بيزعل من تراكم من تراكم خيبات وتراكم ناس قالت كلام ومشيت وتراكم أحلام اتبنت على رملة واتهدت أول ما الهوا اتغير
وتراكم صدق راح لناس خانت وتراكم دموع نزلت في السر ووجع اتقفل عليه جوه صدر ضيق ومش لاقي هوا واللي ما حدش يعرفه إن في قلوب بتتعب من الاحتمال بتتعب من العشم ومن الرغبة إنها تكون زي ما كانت زمان قلوب بتتمنى تعمل إعادة تشغيل لحياتها تنضف من آثار الناس ومن خيبات السنين ومن العلاقات اللي كسرت الثقة ومن الوجوه اللي كانت بتضحك وهي بتطعنك ومن
الأماكن اللي شهدت لحظات ما بترجعش بس رغم كل ده ستلاقي القلب ده بيقوم كل مرة لأنه اتعود يداوي نفسه بنفسه يتسند على ربه يتعلم من الوجع يتشافى على مهله يعرف مع الوقت إن اللي راح ما كانش باقي وإن اللي كسر ما يستحقش يرجع وإن اللي تخلى ما يستحقش دمعة واحدة حتى لو كانت الروح بتوجع أوي بس هتعرف تمسك نفسها هتعرف تقول خلاص كفاية هتعرف تقفل
باب من غير ما تبص وراه هتعرف إن القيمة مش في اللي راحوا القيمة في اللي فضلوك في اللي ما سبوكش في اللي فهموك من غير ما تتكلم في اللي شالوك من غير ما تطلب وتفهم في الآخر إن ربنا لما بيطلع حد من حياتك بيطلع وجع كان مستنيك وإن الوحدة ساعات أرحم من الناس اللي بتمثل وساعات أدفى من حضن مزيف وساعات أغلى من علاقة ما فيهاش تقدير وتعرف إنك تستحق حب
بجد مش حب نص نص تستحق صدق مش كلام تستحق وجود مش تواجد تستحق حد يخاف عليك مش حد يخاف يميل قلبه ناحيتك وتعرف ساعتها إنك لسه قادر تبدأ من جديد حتى لو اتكسرت ميت مرة لسه قادر تطلع روح أنضف وأقوى وأصلب من الأول لأن ربنا ما بيكشفش الوجوه اللي بتمثل إلا علشان يحميك
وما بيكسرش قلبك إلا علشان يبني واحد أحسن وما بيخليكش
لوحدك إلا علشان يعلمك إن أقوى سند في الدنيا هو اللي فوق مش اللي بين البشر
