قطر الغلابة ،،،

،،، قطر الغلابة ،،،
الشاعر / سيد تقي
ركبت قطر الغلابه والمساكين ،
ناس جتتها متلزقه لاجل الدفا ،
جلاليب مليها البرد والزعابيب ،
وتربيعة خضرا عالقوره متقطعه ،
ملاية سودا ملفوفه وجسم نحيل ،
عيال بتصرخ بحرقه من جوعها ،
و سندوتش فول وعود جرجير ،
طعميه بارده وجبنه و خياره ،
وبصله ناشفه وصحن مش قديم ،
حكاوي عن العفاريت والشياطين ،
ودان بتسمع قصص من الأساطير ،
وكهل يحكي حكايه عن العفاريت ،
جنيه لابسه دهب يلمع في عز الليل
وفرسه بيضا تبرطع ولها جناحين ،
ودان مطرطاه للكهل وحكايته ،
وعيون مفنجله ومصدقه القصه ،
وعيال ومكموشه خايفه من العفاريت ،
نسوان جنب البيبان قاعده متربعه ،
باين عليهم خوف من قصة العفاريت ،
وصوت يقطع سكوت السمع للقصه ،
عجميه سخنه وعجوه للغاليبن ،
طاوله وصوت عيل من المفاعيص ،
عيال اتجمعت عالطاوله وتبلع ريق ،
صوت يرزع علي جردل حاجات ساقعه ،
صفير الريح وصوت عجلات وصفاره ،
يا عم الشيخ بلاش عفاريت وجنيه ،
حكايه جديده فيها حبه حنيه ،
حكاية حب للعشاق ،
رواية كلها أشواق ،
تعبنا من الشيطان والجن ،
زهقنا من البصل والمش ،
سكوت فجأه ،
قفف متشاله عالدمغات ،
وصلنا كلنا بسلام ،
وحمد الله علي سلامتك يا عم الشيخ ،
مفيش عفاريت في حكاوينا ،
ولا جني يخوفنا ويرعبنا ،
ركبنا صاروخ وصلنا حتي للمريخ ،
وصلنا كلنا بسلام ،
وحمدالله علي سلامتك ياعم الشيخ ،،،
،،، سيد تقي ،،،