قصيدة ” وحياة عينك 

قصيدة ” وحياة عينك

باللهجة العامية الشاعرة اللبنانية عناية اخضر

وحياةْ عينَك قول شو بدَّك ؟؟
مشتاق اسمَع والحَكي عندَك

محتار تَحكي والعتَب مرفوع
بسّ القلب كاوِيه من بُعدَك !!

حَيران بَعدَك والصّلاة خشوع
مشعال عمري يهتف بعهدَك

خليك ( انت ) ومتِل قبل اسبوع
تٍمشي لَعِندي وما حدَا يصدَّك

تنادي عليّي وخاطري مَوجوع
ولبّي العزيمي ساعة ال بدَّك

واحضنَك بالرِّمش لو مَوجوع
خَلِّيك تا إبقَى انا حدَّك

بغمرَك بالرّمش مش ممنوع
بحطّك بقلبي والحَنين دموع
بس لا تخلّي حَدَا يشدّك .
….

تسكِّر بواب القلب عنّي تروح
وابكي لوَحدي والوَجَع ،صدَّك

ليش تسكُن مخدَعي ، مسموح
وتخون عهدي وتنكس بوعدَك؟

كنتْ إمسَح دمِعتي مجروح
وادعي ل الله تعود ويردّك

ولمين بشكي وبالأسَى ما بُّوح
وبكتُم همومي بخاف ما تهِدّّك

انت النّسيم الفيهِ ردّ الرُّوح
كيف بدّي عِيش من بَعدَك ؟!

كيف بَدّي عِيش مِنْ بَعدَك ؟!

عناية اخضر – لبنان
—————————–