قصيدة ( أسطورة شرقيه فرعونه مصريه )

بتاريخ 2/2/2022
قصيدة ( أسطورة شرقيه فرعونه مصريه )
بقلم الشاعر المصري أحمد إبراهيم النجار

قولتي الحياة وردك
والحنه ف كفوفك
صدّقت أنا وعدك
وسكنت أنا دروبك

برد الشتا حُضنك
والغدر ف حروفك
لِمّي بقا توبك
من حلمك الكداب
طرحه ولونها سواد
سكن الظلام نورك

الحلم فيه أغراب
طردوني من حضنك
ورموني قفلوا الباب
وبعيش أنا غروبك

متكحله عيونك
متزوّقه خدودك
وتوبك المقطوع
وأنا حبي كان مشروع
بوسه على خدودك

لِمي بقا توبك
يا وردة دبلانه
غاب الربيع عنك
والبسمة متهانه
والدمعه ف عيونك

وحافيه على جسرك
غاب الجمال منك
كاسي البياض شَعرك

بااااااااارت سنين أرضك
قاعدة انحنى ظهرك
والليل سَكن توبك

مات الربيع فيكِ
لمّا الصقيع سكنك
ومات هنا شروقك

غني غني
غني بناي الحزن
وأبكي مع غروبك

ده الحزن طال بيكِ
جاري الألم فيكِ
وبيجري ف عروقك

يا صبيه ليه قولتي
إنى دوا عشقك
لما انتِ مش ملكى
ولا كنت يوم مِلكك
ومشتاق أنا شوقك

خلّليتي ليه العشق
يسكن دخل قلبي
آلله يجازى العشق
والله يجازيكِ

بشروقك الكداب
عاشق لياليكِ
وغروبك إللى اتساب
راهب خطاويكِ

شابب حريق فيكِ
بركان مع زلزال
يا غزال ومتحني
بس الآهات دي جبال
لو يوم بقا تحني

وتمدي لي ايديكِ
واشم أنا عطرك
واسكن دفىَ قلبك
واعيش ربيع حضنك

ده عيوني مشتاقه
وشفايفي مشتاقه
أشرب رحيق نيلك
واكتب على جبينك
لحظة شروق شمسك

فى توبك الوردي
طال الظلام بيكِ
بس الشروق طالع
وارسم انا بيدي

الحنة ف كفوفك
حفله وفستان فرح
والتاج على راسك

والطرحة البمبي
وشروق حاضن بابك
وورود على صفوفك

يا عروسة امحيه
سكن الغرام فيا
عاشق أنا عيونك

ورمشك السارح
متزوّقه جفونك
وخدك الوردي
أسطورة شرقيه
فرعونه مصريه

بقلم الشاعر المصري أحمد إبراهيم النجار