علي يحيي يكتب مئوية برازيل الكرة المصرية

بقلم : علي يحيى

السنة دي المفروض مئوية نادي الإسماعيلي ….هو مكنش إسمه الاسماعيلي لما تم انشائه في ١٩٢١ كان إسمه نهضة الشباب المصري

أنا عايز بس أقول إن نادي الإسماعيلي نادي رومانسي …يمكن بطولاته مش كثير …يمكن حاجات كثير ….لكن مين قال التأثير بس بالبطولات؟

ناس الإسماعيلي نادي رومانسي…بمعني إنه له قصص و حكايات جميلة و درامية و مأساوية

نادي الإسماعيلي كسب الدوري في أسوأ سنة في تاريخ مصر و مدينة اسماعيلية و مدن القناة ….١٩٦٧…رمزية إرتباط النادي ده بالصعاب من أول تاريخه …حاجة شكلت ثقافته و وجدانه و التكوين الجيني بتاعه

نادي الإسماعيلي نجم نجومه و واحد من أحرف من لعبوا كرة قدم في تاريخه كابتن رضا ….مات في ريعان شبابه في حادثة مأسوية …..و نفس الشيء حصل مع الحريف محمد حازم

نادي الاسماعيلي هو اللي جمع مصر كلها في ملحمة تاريخية يوم ٩ يناير ١٩٧٠ في إستاد القاهرة الدولي, او استاد ناصر عشان الدقة التاريخية ….١٢٠ ألف مصري احتشدوا عشان يحضروا نهائي أفريقيا عشان يؤازروا أبناء القناة الحريفة المهجرين قدام بطل زائير……أول فرحة مصرية بعد نكسة ١٩٦٧ …..و أول نادي مصري يكسب كاس أفريقيا للأندية

نادي الإسماعيلي رومانسيته في إنه خسر نهائيات أفريقيا بشكل درامي …..أفضل فريق في أفريقيا بلا منازع في ٢٠٠٣ ….يخسر النهائي بسبب مؤامرة إتحاد الكرة إنه منع حسني و أحمد فتحي انهم يلعبوا ماتش الذهاب ……. و مباراة عار على الكرة الأفريقية قدام انيمبا النيجيري اللي إستهلك ما يقرب من ٣٠ دقيقة في الماتش تضييع وقت و الحكم واقف بيتفرج ……غير حظ الإسماعيلي العاثر في نهائي كاس الاتحاد الأفريقي سنة ٢٠٠٠ لما بركات ضيع الإنفراد في أخر دقيقة كان هيجيب لجماهير إستاد ٥ يوليو في الجزائر صدمة عصبية

نادي الإسماعيلي نادي العائلات ….عائلة أبو جريشة الحريفة العريقة بقيادة فاكهة الكرة المصرية علي أبو جريشة اللي في رأيي ما أخدش حقه إعلامياً ، اللي اتفرج على الرجل ده هيفهم إنه كان لاعب أسطوري بمقاييس عصره في مصر …..و طبعاً عائلة درويش و اللي الإسماعيلي إتلقب عليهم دراويش

النادي الوحيد اللي له إبن عم في الكرة المصرية و هو نادي المقاولون بسبب عائلة عثمان أحمد عثمان

نادي الإسماعيلي نادي موسيقي ….إسلوب لعبه مرتبط بالسمسمية و الجو العام المرح في مدينة اسماعيلية …..إسلوب المثلثات و نصب السيرك …اللعب الممتع

نادي الإسماعيلي ما كسبش غير ٣ دوري ….بس كل دوري فيهم كان حكاية و رواية …..فوز عن جدارة و إستحقاق و معاه متعة كمان

النادي المتحر من عقد شمال أفريقيا في التسعينيات و أوائل الالفية لما راح لب الترجي في المنزه ٣ /١ في ٢٠٠٣ ….و ما ادراك ما إستاد المنزه!

إستاد الإسماعيلي كمان له رونق مختلف …..مش مصري الطابع…..تحسه زي ملاعب دول شمال أفريقيا خاصة تونس ….زي ملعب مصطفي بن جنات أو الطيب المهيري أو سوسة ….مدرجاته قصيرة …..صوت جمهوره مرتفع بشكل لا يتلائم مع العدد الصغير ….إستخدام نار و شماريخ أيام ما كان ده مش متعارف عليه في مصر …..ملعب اسماعيلية صعب المراس و اجوائه عدائية جدا جدا جدا …..و يسلام لو الماتش يتلعب في النهار عشان تشوف جمهور اسماعيلية متزين بالأصفر و الازرق أكنك في كرنفال ريو دي جانيرو

الإسماعيلي تراث و تاريخ في الكرة المصرية و عامود من عواميد اللعبة في مصر …..و طول عمره مفرخة للمنتخب و اندية القاهرة …..