طِلعْ كدّاب

طِلعْ كدّاب
خواطر أغاني الأسواني
الشريف_أحمدعبدالدايم

اللي يسيبك سيبك منّه
حتى لو كان سابق سِـنّه
كنت اهواه من صُغرْ سِـنّه
لكن طِلعْ كدّاب
….**….**….**….**….
صاحبت صاحب وصاحبني
انا قلت م نهدّش نبني
وكنت وقت الشدة معاه
والفرح لو هو طلبني
….**….**….**….**….
كانت الحياة سهلة وعادي
راضي بحياته وانا راضي
وكنّا اتنين والجيب واحد
مليان يكُبّ عالفاضي
….**….**….**….**….
في الخير ياما كنت امشيلُه
كام مرة يوقع وانا اشيّلُه
ولو ناديت قُلت ياربي
انا قبل نفسي بدعيله
….**….**….**….**….
أكل معايا عيش وملح
عشّنا الحُزن ويّا الفرح
وعلشانه ياما زرعت الخير
عُمّري م نىتظرتْ الطرح
….**….**….**….**….
كان حبه في عروقي ودمي
وهمّه اشيّلُه قبل همّي
بعاملُه اكثر من صاحب
اخويا م جبتهوش أُمي
….**….**….**….**….
وكبرنا والأيام لفّتْ
زي قاعدة وسيجارة اتلفّتْ
وكل واحد في طريقه
وبحور لُقانا كمان جفّتْ
….**….**….**….**….
صاحبي كِبرْ والله ادّاله
وهو صاحبه قاعد على حاله
اقول ناسيني ولا فاكرني
معقول م جيّتِشْ على باله
….**….**….**….**….
ساعات بكوُن قاعد غفلان
والناس تقول دا صاحبه فُلان
الكلمة كانت تسعدني
واحسّ ضيوفه ضيوفي كمان
….**….**….**….**….
ورحت أدُقْ على بابه
قالوا صاحبك كثير اصحابه
ده حتى اسمك م فاكرهوش
مفيش ميعاد مع جنابه
….**….**….**….**….
وبعيني شايفه ورا ستارة
انا صاحبي مني بيتدارى
الدمعة نزلت من عيني
وقلت ع الصُحبة خسارة
….**….**….**….**….
رجعت ورجليّا م شيّلاني
الصدمة ثقيلة وشـلّاني
قادر كريم يصلح حاله
وربّك كبير يتولّاني

طِلعْ كدّاب
الشريف_أحمدعبدالدايم