جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج
ضهر اتكأت عليه ووقع
بقلم/نشأت البسيوني
ضهر اتكأت عليه ووقع كانت الحكاية دايما على شكل قوة من بره وضعف من جوا كأن البني آدم بيتولد وهو شايل معاه معركة مكتوبة له مش مختارها وكل ما يحاول يهرب منها يلاقي نفسه داخل فيها من باب تاني العمر ساعات يديك ناس تفتكرهم جبر وبعدين تكتشف إنهم الوجع نفسه ناس بيدخلوا حياتك وما تعرفش إن وجودهم كان امتحان طويل مش نعمة وكل لحظة بتقرب فيها
منهم تلاقي روحك بتبعد عنك خطوة خطوة في تفاصيل صغيرة بتكسر أكبر من الكلام نظرة سابوك فيها وانت محتاج حد يسندك كلمة قللوها عليك وانت متشعلق في آخر خيط صبر موقف كان مفروض يكونوا فيه وراحوا وتجاهلوك كأنك مش موجود كأن تعبك مش شايفينه وكأنك مش إنسان له قلب وله روح وله لحظة انكسار يمكن علشان اتعودت تكون القوي اتعودت تكون المتحمل اتعودت
تكون السند فافتكروك ما بتوجعش ما بتتكسرش ما بتحتاجش
والأصعب من ده كله إنك تبص في المراية وتقول لنفسك أنا امتى بقيت بالشكل ده امتى اتحولت من حد بيحلم ويخطط ويمد إيده للدنيا لحد قلبه مطفي وعينه مش شايفة قدامها غير غبار الذكريات امتى بقيت بخاف أصدق الناس بخاف أفتح باب بخاف أدي قلبي لحد يمكن لأنك اتلدغت كتير اتخليت كتير اتحطيت في مقارنات ما
كنتش طرف فيها واتحاسبت على ذنوب ما عملتهاش واتاخدت منك حاجات أنت ما كنتش تتخيل لحظة إنها تتسحب من روحك بالشكل ده وتلاقي نفسك فاكر الأيام اللي كنت فيها بتضحك بصدق الضحكة اللي ما بتتكررهاش دلوقتي ضحكة مخلصة ما فيهاش حساب ولا خوف ولا ألف احتمال وفي نفس الوقت تفتكر اللي علمك الوجع ده كله واللي خلاك تبطل تدي من غير حساب وتبطل
تحلم من غير حدود لأن اللي اتكسر جواك ما كانش حاجة بسيطة ده كان ضلع من ضلوع روحك كان مكان أمانك كان لحظة ثقتك في حد انت اخترته بقلبك مش بعقلك والغريب إنك رغم كل ده لسه جواك حتة بتقاوم حتة بتقول أنا لسه هنا ولسه عندي أمل ولسه قادر أقف ولسه قادر أرمم نفسي حتى لو محدش ساعدني حتى لو مفيش ضهر اتسند عليه حتى لو كل اللي حواليك شايفينك جبل
بس ما يعرفوش الريح اللي بتوقع الجبل عاملة ازاي يمكن لأنك اتعودت تتعامل مع الحياة لوحدك تتعامل مع الجرح لوحدك تتعامل مع الصدمة لوحدك يمكن عشان كده بقيت أشطر من الوجع وأجرأ من الخوف وأوعى من السذاجة اللي كانت زمان مضيعة عمرك
وتفهم فجأة إنك ما وقعتش علشان الناس اللي سبوك انت وقعت علشان ربنا كان عايز يطلعك من دايرة عمرها ما كانت ليك ويشيلك
من قلب علاقة كانت بتاخد أكتر ما بتدي ويبعدك عن قلوب كانت بتستهلكك أكتر ما كانت بتحبك وتبدأ تدرك إن الوحدة أرحم من ناس ما بتشيلشك وإن الصمت أحن من حوار مفهوش تقدير وإن باب مقفول أرحم من باب مفتوح لناس ما تستاهلش تدخل حياتك
وتقف على رجليك وتقول لنفسك أنا اتعلمت اتعلمت إن الضهر مش كل حد وإن الأمان مش كل كلمة وإن الوجوه مش كلها نقية وإن
الضحكة مش دايما صادقة وإن اللي يبيعك أول مرة هيبيعك ألف مرة وإن اللي يخذلك في أسوأ لحظة عمرك ما تعتمد عليه في أحسن لحظة وتعرف ساعتها إنك نجيت نجيت من اللي ما كانش ليك نجيت من اللي كان هيكسر أكتر نجيت من حكاية كان لازم تنتهي علشان حكايتك الحقيقية تبدأ
