صاحبت صاحب

صاحبت صاحب
خواطر أغاني الأسواني
الشريف_أحمدعبدالدايم
وصاحبت صاحب وصاحبني
انا قلت صاحبي ويسعدني
انا كنت وقت الشدة معاه
والفرح لو هو طلبني
…
كانت الحياة سهل وعادي
راضي بحياته وانا راضي
وكنا اثنين والجيب واحد
مليان يفضي على الفاضي
…
بالخير ياما كنت امشيله
كام مرة يوقع وانا اشيله
ولو ناجيت قلت ياربي
انا قبل نفسي بدعيله
…
اكل معايا عيش وملح
عشنا الحزن ويّا الفرح
وعلشان زرعت الخير
عمري ما انتظرت الطرح
…
كان حبه في عروقي ودمي
وهمّه اشيله قبل همّي
اعامله اكثر من صاحب
واخ ما جابتهوش امي
…
وكبرنا والايام لفّت
زي جلسة وسيجارة اتلفّت
كل واحد راح في طريقه
وبحور لُقانا كمان جفّت
…
صاحبي كبر والله اعطاله
وهو صاحبه قاعد على حاله
اقول ناسيني ولا فاكرني
معقول ما جيتش على باله
…
مرات اكون وانا غفلان
والناس تقول دا صاحب فلان
الكلمة كانت تسعدني
واشعر ضيوفه ضيوفي كمان
….
ورحت ادق على بابه
قالوا صاحبك كثير اصحابه
ده حتى اسمك ما فاكرهوش
مفيش ميعاد مع جنابه
…
وبعيني شايفه ورا ستارة
انا صاحبي مني بيتدارى
الدمع نزلت من عيني
وقلت على الصُحبة خسارة
…
ورجعت رجليا ما شيلاني
الصدمة ثقيلة وشـلّاني
قادر كريم يصلح حاله
وربك كبير يتولّاني
صاحبت صاحب
الشريف_أحمدعبدالدايم