جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
ساعة عصاري
بقلم / صالح منصور
ساعه عصاري والدنيا خنقاني
نزلت الشارع وانا
ولا على بالي
رني موبايلي
لقيت اخويا وصاحبي
اللي الزمان نساه ونساني
بعد السلام والشوق سالني
انت فين ده الدنيا واخداني
قلت له نزلت الشارع
ودموعي سبقاني
قلت له صوتك قلقني
قال لي وانت دموعك سبقاني
قلت له نفسي اشوفك
وترجع ايامنا من ثاني
قال لي خلاص نتقابل
في الحي اللي رباك ورباني
وتقابلنا هناك
في البيت الاولاني
وشريط الذكريات بكاه وبكاني
وطلعنا فوق السطوح
وضحكنا من تاني
فكرني بحبي الاول
وفكرته بالثاني
وسنين كثير قوي
والله وحشاني
وافتكرنا ايام الصبا
وغيه الحمام وقهوه
الشيخ امام والحجه فتحيه
ياما كلنا من ايديها احلى طعميه
وشله الحبايب اللي
مات واللي غايب
وفتح شباك الهواء
وظهرت ياسمينه
اجمل بنات الحته
وشهر زاد ليالينا
الزمن بان عليها
كبرت وشعرها شاب
والبسمه غابت عن عينيها
والحزن دبل شبابها
بصيت علينا وضحكت
ضحكه كلها شوق
قالت بصوت مخنوق
رجعتو زي زمان
بس الزمان ما رجعش
رجعتو ثاني عيال
نزلت دموع العين
لما الشريط عدى
عدت ساعات الذكرى
وفقنا على بكره
لا ينفع نفضل هنا
ولا هنا بقى بكره
هات ايديك في ايديا
ونفترق ثاني
يمكن ساعات الذكرى
تمحي من الذاكره
اشجانك واشجاني
وتفك قيد الهموم
سجانك وسجاني
ونرجع مره كمان
لشارعنا من ثاني
