جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج
دروس علمتني الحياه
بقلم/نشأت البسيوني
كل يوم بيعدي يا صاحبي الدنيا بتعلمنا درس جديد دروس مش بنتعلمها من الكتب ولا من كلام الناس لأ بنتعلمها من الوجع من الخساره من الناس اللي كانوا في حياتنا وممشيوش زي ما اتمنينا الحياه ما بترحمش حد بس برضه ما بتسيبش حد من غير درس يفوقه ولا موقف يغيره ولا تجربه تكبره بالعقل والقلب تعلمت إن مش كل اللي بيضحكلك بيحبك ومش كل اللي ساكت راضي ومش كل اللي سابك كان غدار يمكن كان موجوع أكتر منك وسكت عشان ما يوجعكش وتعلمت كمان إن الوجع اللي بيكسرنا هو نفس الوجع اللي بعد كده بيقوينا وإن اللي بيبعدك عن الناس المؤذيه حتى لو وجعك فهو رحمة مش خسارة الدنيا دي ملعب كبير كل واحد بيلعب دوره بطريقته في ناس بتلعب بنية صافيه وناس بتخدع وتغش وناس بتقف تتفرج بس بس في الآخر الماتش بيخلص واللي كان بيجري ورا المظاهر بيطلع خسران واللي عاش بقلب نضيف بيكسب راحته وسلامه تعلمت إن الحياه مش مستاهله زعل ومش مستاهله خصام لأن الوقت بيجري والدنيا مش مضمونه واللي بيروح النهارده ممكن ما يرجعش بكرا اتعلمت أضحك حتى وأنا مخنوق وأسكت بدل ما أندم وأمشي من غير ما أوجع وأسامح حتى اللي وجعني مش عشان يستاهل لكن عشان قلبي يستاهل يرتاح الناس يا صاحبي بتتغير مش لأنهم كانوا بوشين بس لأن الدنيا علمتهم زي ما علمتنا في اللي وجع فبقى جامد وفي اللي اتكسر فبقى حنين وفي اللي خاب ظنه فبطل يثق في حد وكلنا في الآخر ضحايا تجارب بنتعلم بننجرح بس بنكمل لأن مفيش طريق مفرود بالورود دايما في شوك بس الشوك بيعلمنا نمشي بحذر تعلمت كمان إن مفيش حاجه بتفضل على حالها اللي فوق ممكن ينزل واللي مظلوم ربنا بينصره واللي غايب بيرجع واللي كان بعيد بيقرب واللي كان بيضحك النهارده ممكن يبكي بكرا فخليك دايما متواضع متظلمش ومتفتكرش إنك دايم لأن دوام الحال من المحال وفي لحظات الهدوء لما تبص لنفسك في المرايه هتكتشف إنك مش هو نفس الشخص اللي كنت عليه زمان كبرت اتغيرت نضجت بقيت تفهم أكتر وتتكلم أقل بقيت تعرف مين يستاهل وجودك ومين وجوده بيستهلكك وده أحلى درس في الحياه إنك تبقى راجل أو ست فاهمه قيمتك ومش مستني تقدير من حد لأنك خلاص عرفت إن قيمتك مش في نظرة الناس قيمتك في ضميرك وقلبك وفي الآخر بعد كل اللي شوفناه نتعلم نبتسم رغم التعب ونقول الحمد لله رغم الوجع ونمشي في طريقنا وإحنا عارفين إن اللي مكتوب لنا عمره ما هيكون لغيرنا الدنيا مش بتكره حد بس بتختبره وبتعلمه ازاي يفضل واقف حتى لو الدنيا وقعت حواليه افتكر دايما يا صاحبي الوجع مش آخر السكه هو أول طريق الفهم والخساره مش نهايه هي بدايه جديده بوعي أكتر وكل دقيقه عشتها علمتك درس حتى لو ماخدتش بالك خليك دايما مبتسم متصالح مع نفسك وقولها من قلبك الحياه علمتني ومهما وجعتني أنا لسه واقف ولسه عندي أمل
