حصار و حمار و بينهما بغل

بقلم رجب أبو الحسن

اسطبل الخيول
مسنكر البوابة..في وش الجحوش..
مش من مقامنا
اتفضلوا للخلف دور..ما تقربوش..
حرفوش يساوي نفسه بالمماليك..
صعلوك من الصعاليك
تمامه فنكوش
يا دي البلاوي
حاوي يساوي حاشية السلطان..
لابد من إصدار بيان :
بعد سنكرة الببان..
ممنوع مرور الجحش
في سكة الأعيان..
المهم
وبعد إصدار المرسوم..
بيانهم المختوم
قام جحش عازم أمره وقال:
راح افوت..السكة مش ملك لفريق
وفريق لو فات يموت..
لو همه مماليك..
أنا جدري في التربة عميق..
واصل لأول نسخة من أول فريق..
همشي الطريق رغم البيان..
بحافره علم في الطريق زي الحصان..
وبعد كم حافر
دقايق من أمان..
و يا ريته يتحس..
استوقفه عسكري (أحد البغال): أيها اللص..
على فين يا جحش..
السكة دي للخيل ممنوع تخش..
مش لص..أنا زيه حيوان..
ممنوع أخش؟
هو التراب راح يفرز السارق من المسروق..
والله لأنا ماشي ولو مشنوق..
راح أسير..
الرحمة على هذا الحمار
و وافر اللعنات
على باقي الحمير