جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
متابعة/مرفت عبد القادر
البنت الجميلة اللي في الصورة دي اسمها (نعمة سعيد )من كفر الشيخ وعندها 25 سنة (نعمة) اتولدت وهي رجليها الإتنين مبتورين وإيديها اليمين برضه من البداية ورغم إن أسرتها أسرة متوسطة شبه معظم أسرنا بس الأب والأم من الأول كانوا مصممين إن في الظروف دي وبنتنا هتتعلم عادي زى أى بنت في سنها الكرسي المتحرك بقى صديق (نعمة) في رحلتها دخلت مدرسة إبتدائي وكان الأب والأم كل يوم يودوها للمدرسة وهي على الكرسي بتاعها يوم جر يوم وسنة ورا التانية كانت (نعمة) بتفوت في الدراسة بمنتهى التفوق لحد ما خلصت ثانوية أزهرية بمجموع ممتاز وهنا طلب منها كل اللي حواليها إن كفاية تعليم لحد كده والحمدلله إنك أثبتي لنفسك وللكل إنك شاطرة ومميزة لأ أنا هكمل! تكملي إزاى بس أنا عندي طموح وهكمل تعليمي
تحت إلحاحها وافقوا وقدمت في التنسيق وجالها كلية أصول دين قسم حديث جامعة الأزهر. حلو لأ مش حلو لإن الكلية في دمنهور ودي فيه مسافة بينها وبين كفر الشيخ ساعتين رايح وزيهم جاى طب ما كفاية كده يا بنتي عشان بالشكل ده الموضوع هيبقى مرهق عليكي ده غير إن الطريق نفسه متكسر ومش ممهد وعشان تمشي عليه بالكرسي هتبقى القصة مؤلمة لأ برضه بقت (نعمة) البنت اللي لسه سنها ماجاش ناحية الـعشرين حتى؛ تروح موقف العربيات وهي على الكرسي بتاعها عشان تركب ميكروباص يوديها الـى دمنهور وتحضر محاضراتها تمام التمام وترجع وهكذا قد إيه الاربعة سنين كلهم والنتيجة جيد في سنتين وجيد جداً في سنتين
(نعمة)تقف لأ تقول كفاية على كده وأهو آديني حققت نفسي لأ اشتغلت كول سنتر اشتغلت مدرسة بشكل تطوعي لأطفال جيرانها بس. لأ قررت تطور نفسها بنفسها وأخدت ماجستير في إدارة الأعمال من الكلية الملكية البريطانية أون لاين واتكرمت من أسبوعين على فكرة ورغم استحقاق (نعمة)لمعاش تكافل وكرامة اللي بتقدمه وزارة التضامن الاجتماعي بس هي رافضة تاخده لإنها شايفة إن فيه غيرها من اللي ظروفهم صعبة في الحركة أولى بيه منها
بتتسال في مكالمة بتحلمي بإيه قالت (عايزة اشتغل حاجة أحقق نفسي من خلالها بس مش أى شغل وخلاص نفسي في شغل يليق بيا وبطموحي وواثقة إن ربنا هيكرمني وهحقق ده بسألها /مفيش لحظة جت عليكي واليأس هو اللي كسب ردت بسرعة / (لأ أصل هو لو كسب هبقى أنا مش موجودة)
نعمة سعيد/ حدوتة مصرية معجونة بجدعنة ولاد البلد اللي لما بيحطوا في دماغهم حاجة لازم يعملوها حدوتة تستحق تتعرف وبنت تتوزن بالدهب تشّرف أى مكان هتبقى موجودة فيه اللي بيعوز حاجة بيعملها إركن أى ظروف على جنب مفيش حاجز اسمه سن ودايما فيه فرصة لأى حد يعمل أى حاجة في أى وقت المهم إن نيته تكون حلوة تسلم إيدك يا (نعمة)ياعظيمة بالناس اللي زيك الدنيا بتحلو والله معاهم
