جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
بقلم/ امل امين
أنا حاسس صحيح تايه
ومش عارف طريقي إزايّ
وبحاول أكيد أفهم
وبتعلم لكن نسايّ
يمين السكة أنا واخدها
واحياناً تلف شمال
تقولي الدنيا بعاندها
وتقلب وشها في الحال
وأطنش بس مش اهبل
لا أبيع ولا حد يخسرني
وياما أبكي وابان عيل
ومين عل عيبي يقبلني
وبسمع من الملايكة كلام
الاقي الجني يلحقني
يقولي ياعم ده اسمه كلام
كده ع الأرض ضاع حقي
أنا حافظ ومش فاهم
وكل الكون بقا تاعبني
لا لاقي شبيه ولا تناغم
واي حوار معذبني
وبرجع أصلي واستغفر
ف غنوه تهزني و أرقص
ابان مجنون و بستهتر
ضميري يشيط اوي ويقرص
ياربي .. ايه طريق الصح
بقيت محتار ومتشتت
خلاص شطبت صبر أهو بح
ومش طايق ومتعفرت
وليه أحكي وهشكي لمين
قدري يا دنيا ونصيبي
هدف واحد وله طريقين
حياتي وغاوية تعذيبي
واهي أيام و هتعدي
تشد ساعات وبتهدِي
بترفعني لدور عالي
وترزعني على الأرضي
وعادي
سمايا هياها
ونفس الأرض
دي ..أرضي
