جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
بين الوجع والأمل.. المواطن لسه بيحلم
بقلم/نشأت البسيوني
بين كل تنهيدة وجع في مواطن لسه بيقول الحمد لله ولسه عنده أمل رغم كل اللي شايفه يمكن تعب ويمكن شاف كتير بس عمره ما كره البلد دي لأن جوه قلبه دايما في حتة صغيرة كده فيها حنين وفيها حلم وفيها أمل مش راضي يموت المواطن اللي بيصحى بدري يروح شغله وسط الزحمة ويتعب عشان لقمة عيش بالحلال يمكن ماحدش بيحس بتعبه ولا بيشكره بس هو عارف إن رزقه مكتوب وإن الصبر مفتاح الفرج المواطن اللي بيشوف الأسعار نار والعيشة بتغلى كل يوم ومع كده بيكمل وبيضحك في وش ولاده عشان مايحسوش بالضيق اللي جواه المواطن ده بطل من غير سلاح ومحارب من غير درع هو اللي شايل البلد على كتفه بيزرع بيبني بيعلم وبيحلم بغد أحسن يمكن ماعندوش صوت عالي يوصل للمسؤول بس عنده دعوة صادقة بتطلع بالليل تقول يا رب خلي البلد دي بخير واهدي المسؤولين ووسع رزقنا وهي الدعوة دي اللي لسه بتخلي الدنيا ماشية بين الوجع والأمل فيه صبر طويل وفيه ناس لسه بتصدق إن بكرة ممكن يكون أحسن لسه فيه شباب بيبدأ من الصفر وستات بتكافح عشان بيتها ورجالة بتتعب عشان ولادها يكملوا تعليمهم ولسه فيه ناس بتساعد غيرها من غير ما تستنى شكر البلد دي مليانة خير بس الخير ساعات بيستخبى وسط الغبار محتاج بس حد ينفخه وحد يشوف الجمال اللي جواها المواطن اللي لسه بيحلم مش غبي هو عارف الوجع حافظه سطر سطر بس بيحلم غصب عنه لأن الحلم بالنسباله مش رفاهية ده وسيلة نجاة بيحلم بيوم يشوف فيه العدل ماشي في الشوارع والمستشفيات مفتوحة للكل والمدارس بتخرج أجيال بتفهم مش بتحفظ بيحلم يشوف المسؤول بيخدم مش بيأمر والبلد فيها كرامة قبل الفلوس بيحلم إن كل تعب سنين طويلة مايروحش هدر وإن في يوم هييجي الفرج اللي يستحقه ويا ما البلد دي شافت وجع وشافت شدائد لكن عمرها ما وقعت لأن المواطن فيها قلبه أقوى من الحديد ولسه بيقول كل يوم يمكن النهارده صعب بس بكرة أحسن بإذن الله الأمل مش رفاهية الأمل حياة والمواطن اللي لسه بيحلم هو اللي بيخلي الدنيا فيها معنى ولو المسؤول بص على الوجع ده بعين الرحمة وشاف في عيون الناس التعب والأمل سوا ساعتها هيعرف إن أعظم مسؤول هو اللي يمسح دمعة مش اللي يكتب تقرير وفي الآخر بين الوجع والأمل المواطن لسه واقف ولسه بيحاول ولسه بيحب ولسه بيقول بلدي غالية عليا يمكن التعب طال بس طول ما القلب لسه بيحلم البلد عمرها ما هتضيع لأن المواطن هو الوطن والوطن هو الحلم اللي ما بيموتش
