جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
بقلم / احمد الخولى
وانا بتصفح الفيس لقيت ان الامم المتحدة مقرره ان اول اكتوبر يحتفل العالم بكبار السن كرد جميل لهم عما قدموه طوال عمرهم اخدنى التفكير فى المسنين و ذكرياتي معاهم اللهم ارحم موتانا وفجأه اتصدمت
ايه دا ؟
امتى حصل ؟
ازاى حصل ؟
انا بقيت مسن !!!!!!
لا مش ممكن انا اوشكت على نصف قرن من الزمان فى هذه الحياه ايوه فى شباب كتير قوى بيقولولى اتفضل يا حج ويقدمونى عنهم بحكم السن ايوه اطفال كنت بلاعبهم اصبحوا اباء وأمهات بس انا لسه جوايا الطفل الشقى والشاب الطموح لسه جوايا طاقه و حيوية لسه بحب وافرح وعايز اعيش لسه بواكب التكنولوجيا اه عندى ذكريات كتير قوى بس لسه حاسس انى فى البدايه بس اى بدايه بدايه النهايه افتكرت امى صاحبه العقل الرصين والفكر الراجح والشخصية القويه فاكرها فى شبابها والكل بيجى ياخد رايها الكبير والصغير وافتكرتها وهى فى اخر ايامها طفله صغيره تنتظر رأيى وتسمع كلامى افتكرت قد ايه كنت بسمع كلامها وانا صغير واصبحت تسمع كلامى وهى كبيره افتكرت اللحظه الى ماتت فيها بين اديا وقد ايه الالم الى عشته بعدها ولسه مفتقدها افتكرت انى كنت ساعات بزعلها واعتبرها مش فاهمه وعجزت واقولها متشغليش بالك انت يا امى افتكرت اما كنت ابقى راجع تعبان وهى تبقى عايزه تحكى معايا واسمعها مع ان سمعت نفس القصه مرات ومرات اه كنت بضايق واتخنق بس كنت بسمعها علشان متزعلش كنت ساعات اقاطعها واقولها ايوه حصل واكمل الموضوع فى كلميتين علشان اقوم
ياااااه كنت احيانا قاسى قوى من غير ما اركز كانت الحياه وخدانى واولادى وشغلى والتزاماتى دلوقت اتمنى لحظه وتيجى تحكيلى واسمعها واضحك معاها حاولت اكون ابن بار لاخر لحظه ولله الحمد ماتت بتدعيلى
بس دلوقت حسيت انى كنت مقصر معاها قوى مكنتش محتاجه انى اجيبلها واعملها كل الى عملته قد ما كانت محتاجه انى اقعد اتكلم معاها واخد رأيها ومحسسهاش انها كبرت وعجزت فهمت متأخر يا امى سامحينى
الله يرحمك ويغفر لك ويسعدك..
ودلوقت احب اقولكم احبابى قربوا من المسن أعطوه حقه فى الحديث اسمعوا رأيه طبطبو على قلوبهم التراحم مش مادى التراحم معنوى حقا ان كتاب الله لم يترك لنا شيئ فبه جميع قوانين الكون ولكننا نفهم متأخر
أقرأ قوله تعالى..
(وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا ۚ إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلَاهُمَا فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا )
صدق الله العظيم
بالله عليكم رفقا بالمسنين سواء ارحام او حتى غرباء
افيقو قبل ان تصلوا لعمرهم وتحتاجوا مالم تقدموه فلا تجدوه فكله سلف ودين
