القط و الفار

بقلم رجب أبو الحسن

هتخف الأحمر للأخضر..
راح أخفه لأفتح م التخفيف..
أنا أصلا مجنون بستحمر..
هتخفه هحطك ف الأرشيف..
لو فاكر نفسك يعني تقيل..
أنا واخد في التقل ميدالية..
لو فاكر نفسك نجم بليل..
فأنا أعلى من النجمة العالية..
لو تحسب قلبي مجرد حد..
فأنا حاسبك واحد م المهافيف..
هتخف الأحمر للأخضر..
راح أخفه لأفتح م التخفيف.
أنا كاتب إقرار بمحاسنك..
وأبصم بالعشرة..
واحلف بالله ما لقيت حسنك..
ولا حتى ف نشرة..
لكن وبرغم اني مقر ..
على مهلك فوق..
اوعاك تتمادى وتتغر..
أنا قبلك فوق..
وإن كان ع الشوق..
أنا أموت محروق
ولا أكون لك ضيف..
هتخف الأحمر للأخضر..
راح أخفه لأفتح م التخفيف..
هتشوفني بعين..
راح أشيلك جوه يمين وشمال..
هتخطي برجلك شبرين..
راح أطوي عشانك أميال..
إنما هتكش..
هقلب لك وش..
ده أنا آكل مش بنص رغيف..
ولا تعمل فيها تقيل يا خفيف..
هتخف الأحمر للأخضر..
راح أخفه لأفتح م التخفيف..
مش قط و فار..
ولا فيا للعبك حيل و لا حول..
هتخف حمار راح اخف خضار..
و الماتش هيخلص من جولة..
أنا مش على ايدك..
ولا صورة تشخبط بالألوان..
هتزيد من هجرك راح أزيدك..
أنا جوه دماغي حجر صوان..
والقلب ان حن وقال يا نزيف..
اعمل عملية قلب نضيف..
هتخف الأحمر للأخضر..
راح أخفه لأفتح م التخفيف