الفنانه الصاعده الجديدة “فاتن سعيد” فى برنامج صاحبة السعادة..

أستضافت الفنانة والإعلامية إسعاد يونس من خلال برنامج “صاحبة السعادة” على قناة “dmc”، مجموعة من نجوم الدراما الجدد، وأهم الوجوه الصاعدة، الفنانة فاتن سعيد والتى تحدثت عن حياتها وبدايتها

قائلة: “أتولدت فى السعودية وقضيت وقت أبتدائى هناك، وجيت على دمياط سادسة أبتدائى وكملت إعدادى وثانوى في دمياط وجيت القاهرة فى أولى كلية”.

وأضافت قائلة: – “دخلت كلية طب بشري لأنى كنت مجتهدة ومتفوقة في ثانوي، ومعروفة مجموع كبير يعنى طب، كنت عارفة إن لما هاجى القاهرة هيفتح ليا حاجات كتير؟، ودرست وأخدت الشهادة وعملت اللى نفسى فيه”.

وتابعت قائلة:- “التمثيل بدأ معايا من الكلية، لأن فى دماغى من صغرى بحب الأفلام، فهل أنا بحبها عشان بحب أهرب من الواقع ولا أنا بحب التمثيل اللى هى مهنة صعبة جدا وعاوزة أمتهنها، واكتشفت ده وأنا فى الجامعة”.

وعن بدايتها الفنية قالت فاتن سعيد: “فى رمضان 2023 كان أول مسلسل ليا فى رسالة الإمام، بدأت بالصعب التاريخى، وكنت عاملة دور ابنة الإمام الشافعى اللى بيجسده النجم خالد النبوى، ولكن الموضوع مكنش صعب فى اللغة العربية لأن دراستى كانت بالعربى وكنت بلعب مسرح وأغلب النصوص كانت باللغة العربية، وبعدها عملت مسلسل العتاولة”.

وعن مشاركتها هذا العام قالت: “جالى فى الأول مسلسل”ظلم المصطبة،” هانى خليفة كلمنى وقالى عاوزنى فى دور، من غير ما أعرف تفاصيل قلتله أنا معاك، وفعلا مكنتش قرأت أى ورقة بس كنت وواثقة فيه، ولكن أستاذ محمد على كمل مكانه بعد كده”.

وتابعت قائلة:- “أنا بحب المشاهد اللى فيها لحظات صمت، ولما بيجيلى مشهد كلام قليل ومشاعر كتير بحبه جدا، أما مشاركتى في لام شمسية فأنا كان نفسى أشتغل مع كريم الشناوى وعملت أوديشن أتبعتلى مشهدين للشخصية وتخيلتها وعملتهم وأختارونى بعدها”.

وعن مسلسل قهوة المحطة قالت فاتن سعيد: “أتبسط جدا فيه وبحب الشخصية دى ولسه ملمسة معايا لغاية دلوقتى، وأستاذ عبد الرحيم كمال بيخلق جو فى شجن وتحس أنك فى عالم تانى، وأنا مش عارفة أطلع من الشخصية وفعلا بيخلى الواحد فى عالم تانى مختلف”