جريدة الوطن الاكبر الوطن الاكبر ::: نبض واحد من المحيط الى الخليج .. اخبارية — سياسية – اقتصادية – ثقافية – شاملة… نبض واحد من المحيط الى الخليج 
الطيبين مابيموتوش بس بيتعلموا ما يوجعوش نفسهم تاني
بقلم/ نشأت البسيوني
فيه ناس يا صاحبي الطيبه في دمها مش تمثيل ولا تصنع ناس قلبها نضيف نيتها سليمه لو حبت تحب بصدق ولو زعلت تسكت عشان متكسرش ولو اتوجعت تضحك عشان متخليش اللي حواليها يقلقوا عليها الناس دي مش عايشه علشان تنافس حد ولا تبين للناس إنها أحسن دي ناس بتعيش علشان تحافظ على قلبها على طهارته على نقاوته اللي الزمن مشي عليه بسنينه ووجعه
بس مهما كان القلب نضيف بييجي عليه وقت يتعب يتعب من كتر ما يتكسر يتعب من كتر ما يدي ويتنسى يتعب من كتر ما يشوف خيبه الأمل في وشوش كان شايف فيها الدنيا القلب الطيب لما يتعب بيتغير مش بيكره بس بيبرد يبطل ينده على حد يبطل يبرر يبطل يدي فرص ويبقى عايز يعيش في هدوء بعيد عن الزحمه اللي كلها وجع فيه فرق كبير بين إنك تموت جواك وإنك تتعلم تحمي نفسك الطيبين مابيموتوش بس بيتعلموا ما يوجعوش نفسهم تاني بيتعلموا إن مش كل الناس تستحق العطاء وإن في ناس وجودها وجع وإن السكوت أوقات بيبقى أرحم من الكلام اللي ملوش معنى كان زمان أول ما حد يبعد يتعبوا ويجروا وراه دلوقتي لما حد يبعد يسكتوا ويقولوا اللي عايزني يعرف طريقى واللي مش عايز ربنا معاه مش قسوه بس خلاص القلب تعب من الجري ورا ناس عمرها ما قدرت تعب من الوعود اللي اتقالت وتنسيت تعب من الحنيه اللي اتقابلت بالبرود الطيبين دول لما بيختفوا محدش بيحس بس لما بيرجعوا ربنا بيعوضهم بيعوضهم براحة بال بناس جديدة بتفهم قيمتهم بلحظه دعوه صادقه تتفتح بيها أبواب كانت مقفوله بحاجات بسيطه بس تملى القلب طمأنينه هما مابيموتوش لأن اللي جواهم مش بيتبدل هو بس بيتشكل على شكل عقل أكتر يبقى قلب نضيف بس واعي حنين بس حذر صادق بس مش سهل يخدعوه الطيبين بيبقوا زي البحر الناس بتيجي ترمي وجعها فيهم وترجع مرتاحه بس محدش بيسأل البحر نفسه بيتوجع من الموج اللي عليه قد إيه وهما برضه كده الكل ييجي يفضفض يشتكي وهما يسمعوا ويساعدوا بس أول ما يحتاجوا حد الدنيا تسكت والناس تختفي ومع كل ده عمرهم ما اتمنوا الشر لحد ولا شافوا وجع في غيرهم وفرحوا ولا عرفوا يناموا وفي قلبهم كرهو هما اللي بيسامحوا من غير اعتذار وبيساعدوا اللي أذاه وبيبتسموا وهما موجوعين وبيقولوا الحمد لله حتى لما وجعهم فوق احتمالهم بس في يوم بييجي يتعبوا مش تعب جسد تعب روح يبصوا في المرايه ويقولوا كفاية مش عايز أوجع نفسي تاني مش لأنهم بقوا قساة لأ بس لأنهم فهموا إن القلب محتاج راحه مش كل وجع يستحق صبر ومش كل إنسان يستاهل وقتك بيتغيروا بصمت مبقوش يجروا على الناس مبقوش يشرحوا كتير مبقوش يدافعوا عن نفسهم بقوا يفهموا إن اللي عايز يفهم هيشوف الحقيقة من غير شرح بقوا يعرفوا إن اللي بيحب بجد مش بيشك وإن اللي يوجعك مره هيوجعك تاني مهما وعد بس في نفس الوقت الطيبين لما يهدوا بيبقوا أحن من الأول لأنهم شافوا الوجع فمش عايزين حد يحس بيه بيقولوا كلمه حلوه للي محتاج يسمعها وبيسندوا حد غريب من غير مقابل وبيفتكروا دايما إن ربنا شايف وإن الخير اللي بيعملوه مش هيروح هدر الطيبين دول ممكن يختفوا من حياة الناس بس عمرهم ما يختفوا من قلوبهم اللي خسر طيب خسر كنز اللي وجعهم هيفضل ندمان طول عمره لأن الطيبين لما يبعدوا بيبعدوا من غير ضجه بس يسيبوا فراغ كبير وفي يوم لما الوجع يخف يبصوا للسما ويقولوا الحمد لله على الوجع اللي خلاني أفهم الحمد لله على الخذلان اللي خلاني أختار صح الحمد لله على الأيام اللي علمتني أعيش من غير ما أتعلق وأحب من غير ما أتعلق بالنتايج وأسامح بس من بعيد الطيبين مابيموتوش لأن الطيبه مش صفه دي روح روح من ربنا بتفضل فيهم مهما الدنيا وجعتهم بتفضل منوره جوانبهم حتى لو كل النور اللي حواليهم طفى هما اللي لما تمشي جنبهم تحس بالراحه لأن فيهم طاقه حلوه ربانيه فيهم رزق في وجودهم بركه في كلامهم وفيهم نور في ضحكتهم حتى لو جواهم وجع كبير خلي بالك لو لقيت طيب في حياتك احافظ عليه لأن الزمن بقى قليل فيه الناس النضيفه اللي بتدي بضمير وتحب بصدق وتسامح بقلبها مش بعقلها وإنت كمان خليك طيب بس مش سهل حنين بس بعقل وسامح بس من بعيد اعرف إمتى تحافظ وإمتى تمشي بس أهم حاجه متخليش وجع الناس يغير نورك لأن الطيبين هم اللي بيخلوا الدنيا لسه فيها خير
