الطريق

الطريق
****
بقلم /  عادل عبد الرازق
*******************
ما تردنيش يا طريق مكسور
ما ترجعنش أحبي جريح
غاب القمر والنور
واتفرشت أرض الليل تباريح
ومشيت وانا خايف
واخداني عواصف
ولا سامع ولا شايف
غير صوت الدمعة في كل الأركان
…
أحزان يا ليل الشارع
بردان يا قلبي وحيد
مخنوقة غناوي الروح
وملامحي مالياها التجاعيد
داير ما يدور
سور ووراه ميت سور
ولا قادر أعديّ
لأني لا انا مارد ولاعصفور
وحيطان ووراها حيطان
وقضبان ومحاوطاها قضبان
…
أنا مش مصدق فراقنا
خيال كان ولاّ حقيقة
متغرب أنا في عشقك
ومشاعري في حبك غريقة
باداوي جراحي ما تنتهيش
وأحس دمعي وما يتبكيش
وطريقي ليكي ما بينتهيش
ولا كانلي إليكي عنوان
…
خان الزمان أحلامي
وضحك على هزيمتي
ياما حلمت وحلمت
واتكسر حلمي يا حبيبتي
وخادني ليل وغيام
وسنين ضاعت وأيام
ولا عمري قلت حرام
يا دنيا ده انا إنسان
…
يا واخدة عالترحال
سايبة قلبي لمين
ده انا من غيرك
مهموم مكبوت حزين
وسألت كتير كتير
ومشيت كتير مشاوير
لا كانلي يوم مصير
في اللي جي ولا اللي كان
…
راجعلك تاني يا طريق
يمكن نوصل إليها
راجعلك تاني يا طريق
يمكن تلمحنا عينيها
وحشتيني يا حبيبتي
يا وطني ومدينتي
أنا في الطريق منتظرك
لو مرّ حتى ألف زمان
***
عادل عبد الرازق