الدين زمان وتحول الضمائر والاخلاق الان

.. زمان كان الإسلام مختلف حبتين عن دلوقت…
ومن ملاحظاتي عن الدين زمان أقدر أتذكر الآتي:
1- ماكناش نعرف ولا واحدة محجبة في مصر كلها غير أم محمد اللي كانت بتشتغل عند أحد قرايبنا
2- ماكانش فيه رجالة عندهم زبيبة في الوجه غير السني اللي كان بيشتغل في العجيل بتاع وسط البلد.
3- عمري ماشفت راجل في الشارع لابس جلابية قصيرة ولا ستات منقبات
4- ماكانش فيه ستات بتروح تحضر درس ديني عند سوسو صاحبتهم مع الشيخ عبد الصبور اللي بيعرفهم دينهم أكثر
5- البرنامج الديني الوحيد على التلفزيون كان نور على نور يوم الجمعة قبل الماتش وكان بيقدمه أحمد فراج و كان بيلبس بدلة و إتجوز صباح يوما ما ، مش شيخ فى كل برنامج .. ناقص بس طبق اليوم!
6- ماكانش فيه حد بييجي البيت زيارة ويقعد يعمل هيصة ويسأل إذا كان عندنا سجادة صلاة أو إتجاه القبلة فين.. كانوا بيصلوا من سكات.. ده ان حسنا بيهم اصلا..
7- الناس عمرها ما كانت بتوقف شغلها أو إجتماعاتها علشان يلحقوا العصر
8- الناس كانت بتحج مرة واحدة في العمر وماكانوش بيروحوا عمرة كل سنة ولما يروحوا كانت الستات بتلبس أبيض في أبيض مش إسود زي دلوقتي..
9- الحي كله كان فيه جامع واحد ومافيش زاوية تحت كل عمارة..
10- عمرنا ما كنا نسمع عن إبن تيمية ولا كل الناس اللي بنسمع عنها دلوقت
11- ماكانش فيه شرائط قرآن بصدى الصوت
12- عمرنا ماكنا بنسمع عن عذاب القبر والثعبان الأقرع
13- الشيوخ اللي كانوا بيطلعوا في التلفزيون كانوا بيطلعوا ببلاش لنشر الدعوة مش علشان يعملوا قرشين ..
وكان فى دولة لتراقب وتمنع وتمسك اللي يغذى الفرقة بينا..
اللي بقت العادى فى تلفزيون الدولة وليل نهار ..
ومشايخ اسامى بتكفر وتفرق ..
تفرقة بين .. مسلم ومسيحى ..
وست وراجل..
وست محجبة ومش محجبة..
منقبه والمحجبة..
واللستة تطول!
14- عمرنا مااهتمينا ولا سألنا زمايلنا في المدرسة مسلمين ولا مسيحيين
15- الأرض كانت كروية لغاية لما الشيخ بن باز بتاع السعودية ظهر وأفتى أن الأرض مسطحة
16- لما حد كان بيخلف طفل كانوا بيعملوله سبوع مش عقيقة
17- لما كنا بنرد على التليفون كنا بنقول ألو مش ألو سلاموعليكو
بصراحة وحشني ..الإسلام اللي اتولدت عليه ..
واتربيت على مكارم أخلاقه..
مش بنفاق دروشته !
والادعاء والتخفي ..بكذب أزيائه !
و كااااااااان في إسلام في مصرررررر عاااااادي جدا
اعجبني