البسبوسه بالجرامات

أميرة العركى

المقادير دى مظبوطه بالمللى
ماحدش يجووود من عنده ارجوكم

٥٠٠ جرام سميد (خشن)
٣٠٠ جرام سكر أبيض ناعم (سكر التموين ماينفعش)
١٠٠ جرام سمنة حيوانى بقرى نوع كويس (انا بستعمل شيراتون)
٢٢٥ مللى حليب كامل الدسم (بدرجة حرارة المطبخ)
معلقتين سمنة سايحة نستخدمهم فى تسوية وش الصينية بإيدينا

السيرب ..
كوب سكر ٢٠٠ مللى
اتنين كوب ماء بنفس الكوب

يضاف عليه بعد ما يغلى غلوة واحدة نقطتين عصير ليمون مش اكتر عشان طعمه مايبانش ويضاف باقى معلقتين السمنة السايحة

الطريقة:

نضيف السمنة على السكر ونقلبهم فى بعض كويس جدا ، وبعدين نضيف السميد ونقلبهم كويس سوى ، وبعدها الحليب ونخلط الخليط كله مع بعضه هندهن الصنية زبدة ونصب الخليط ونبل ايدينا سمنه ونساويه ، وبعدها نخبط الصنية على الرخامه من كل الجوانب عشان البسبوسة تبقى متساوية ارتفاع البسبوسة ما يزيدش عن سم ونص على الأكثر يعنى من عقلة صباع لعقلة ونص بالتقريب

الفرن لااازم يكون سخن قبلها على الأقل بربع ساعة

البسبوسة تكون ساخنة والسيرب دافى مائل للبارد نشرّبها كل السيرب وثوانى ونفضى الزيادة برة الصينية التسوية على درجة حرارة ٢٢٥ لمدة من ٣٠ ل ٤٠ دقيقة ماينفعش نفتح عليها خالص قبل ٣٠ دقيقة

مقاس الصينية ٣٢ وياريت صينية حرفها واطى عشان ما تتشققش من النص البسبوسة ما تتقطعش وتتاكل مباشرة لازم تبرد على الأقل نص ساعة وكل ما يكون اكتر كل ما يكون أفضل عشان ما تفرولش

نمشى على الخطوات دى بالمللى هتطلع احسن من بسبوسة اى محل حلوانى