موال لازم يتقال .. لأجل الغَمام يِتشال

مع حفظ حقوق الملكية الفكرية
تحياتى الشاعر
فريج فراج

موال لازم يتقال .. لأجل الغَمام يِتشال
خواطرى
مع كتابة فن الموال

قليل الأصل عُمره
ما شال للأصالة جميل
لو يوم رآك شبعان
يِمشى وراك مِيت مِيل
أو يوم لِحَظَك جَبر
سِنة يادُوب تَعديل
تلاقيه مِلازم كَضِلك
عامل صاحب وخَليل
وإن يوم رَماك الزَمن
والدُنيا بيك بِتميل
عَمال تعافر لَ تغرق
والحَبل فَك فتيل
يزُق فيك بعصاه
لاجل المُصيبة تِشيل
الدُنيا دى مَدرَسة
والعِلم فيها عَويل
واللى مَانال حِصته
منها يشوف مَواويل
لازم تكون فَرزَجى
لَماح مَعاك مَنديل
تِلم فيه الأصَالة
وإِحرِص يكونوا قَليل
الكُترَة مش بالضرورة
تنفع مَعاك وتكِيل
عايز تصاحب ياصاحبى
خُد للمُصاحبة أصيل
يصُون معاك عِشرتك
فى الزَنقَة يِبقى سَبيل
تِرمى عليه الهِموم
تلاقيه صابر ويشيل
لا يوم يقولك تَمن
للوَقفَة والتأصيل
ولا يوم تِحس بندَم
إنك صَاحبت أصيل