أخبار عاجلة

المذيع شريف مدكور لبرنامج “ع المسرح” بحب نفسى وأنا صاحب الفضل على نفسى..

المذيع شريف مدكور لبرنامج “ع المسرح” بحب نفسى وأنا صاحب الفضل على نفسى..
بقلم/ سماح عبدالغنى
حل المذيع #شريف #مدكور ضيفاً على برنامج “ع المسرح” مع الإعلامية منى عبد الوهاب على قناة الحياة
قال الإعلامى شريف مدكور، بحب المسرح جدا، ولو تخيلت حياتى مسرحية هيبقى إسمها “شارع شريف”، لأن فى الشارع بتلاقى كل حاجة فيه المدرسة والمخبز والجامع، وكل الأوقات بحبها وبحب كل يوم بيومه وبعيش كل لحظة، وبشعر أن كل أيام ربنا حلوة..
وأسترسل قائلاً:- “أنا شخص متفائل وبحب كل حاجة تكون إيجابية، وبتجنب المر، وكنت طفل هادى ومؤدب جدا وخايب فى المدرسة والأخير على الفصل، والمدرسات كانوا بيحبونى، وعشت طفولة حلوة أحسد نفسى عليها بسبب أمى وأبويا وجدودى”.
وأكد حديثه “كنت محظوظ أنى شفت كل جدودى وأتربيت فى خيرهم وحضنهم، وجدى الفريق محمد فوزى كان له النصيب الأكبر، وكان فى عمله قوى وصارم وعسكرى من الدرجة الأولى، وفى بيته عكس ذلك ومعايا أنا كان الأمر مختلف، وكان شايلنا وهو بيضحك فأنا أول حفيد عنده توفى وأنا عندى 29 سنة وكان مستمتع بهدوئى، وأخدت من طباعه الدقة والإهتمام بالتفاصيل والإلتزام وإحترام الآخر وثقافته، وكان بسيط”.
قال الإعلامى شريف مدكور، أرتباطاتى دائما بتبوظ بعدما يكتشفوا إنى سى السيد، ووالدى مكنش كده، وأنا عشرتى صعبة ومش أى حد يقدر يعيش معايا فى مكان واحد مدة طويلة، بسبب النظام والأنضباط والنظافة المفرطة، وعندى وسواس فى موضوع النظافة والنظام والترتيب ولا أقبل بالهرجلة فى البيت”.
وأوضح قائلاً :- “أن شريف اللى بيطلع فى برنامجه على الشاشة يطلع بوجه طفولى فيه شوية براءة لأن البرنامج ترفيهى للأسرة المصرية، وأنا فى حياتى هادى مش برقص وأتنطط، وبعمل ده فى البرنامج عشان دا أكل عيشى”.
ولما متحققش حلمى فى الجامعة الأمريكية وكلية فنون جميلة أخذت ثمن السيارة وفتحت مصنع، وده تفكير تجارى وأبويا كان تاجر وكنت بروح معاه الشغل وكان يستورد هدوم والتجارة كانت بتجرى فى دمى، مضيفا، دخلت كلية تجارة فشعرت بالإحباط فاخدت ثمن عربية كان هيشتريهالى والدى فعملت بها مشروع لتصنيع ملابس البنات فى الأزهر وما تبقى اشتريت بيه سيارة صغيرة، وبعدها بعام اشتريت شقة وعربية”.
وأضاف شريف مدكور، أتعرض عليا بطولة فيلم “المسطول والقنبلة” ولو كنت عملته كان ممكن أكون نجم سينما كبير وكان نفسى أعمله، موضحاً أن ممدوح الليثى كلمنى وقالى تعالى دلوقتى ولما حضرت عرضوا عليا بطولة الفيلم وذاكرت الفيلم حوالى 3 شهور ومتعملش الفيلم إلى الآن، وكان فيلم سياسى فيه مشاهد قاسية وصعبة…
وتابع قائلاً:- بحب أوصل وأدوس على أى معوقات أو مطبات زى القطر وماشى فى سكتى ماليش دعوة بحد، وأنا صاحب الفضل على نفسى، أنا بحب نفسى جداً، و”بحب شريف مدكور جداً”وأخرج وأسافر مع نفسى، ووالدى ووالدتى وعيلتى وأصحابى أحب الناس ليا”..
وأكد:- أن أكبر رابط بينه وبين برنامجه الجمهور، لأنه قاعدلى كل يوم الساعة 4 عشان يتفرج عليا، وبيتقال عليا مذيع ستات مصر وأتريقوا عليا، بس أنا مزعلتش وده تاج على راسى، وأمهات وجدات مصر بيثقوا فيا ثقة عمياء، يارب أكون أد الثقة دى والأطفال كمان بيثقو فيه، وكنت لما أوجه نصيحة للأطفال فى البرنامج ألاقى تانى يوم الأمهات على الفيس باعتالى فيديوهات للأطفال وهما بيطبقوا اللى بقوله وده بيفرحنى”.
وتحدث قائلاً:- “كنت معد بقناة النيل للأسرة وأصبحت مذيع بالصدفة وكانت صدفة حلوة وعمرى ما كنت متخيل أطلع قدام كاميرا وأكون جرىء وحبيت اللى بعمله وبموت فى شغلى، مستمتع بالبرنامج والمشاهدين”.
“وقوفى قدام الكاميرا كان تحول كبير فى حياتى وكنت خايف، وعملى كمذيع بالقنوات المتخصصة كان نقطة تحول أيضا وبرنامجى كان يصرف على القطاع، وشعور جميل لما أروح القناة وحد يقولى انت اللى شايل القناة وده مسئولية بترعبنى”.

شاهد أيضاً

أحمد العوضى وتصريحات ضرب نار فى برنامج “ع المسرح”

أحمد العوضى وتصريحات ضرب نار فى برنامج “ع المسرح” بقلم/ سماح عبدالغنى حل الفنان #أحمد …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *