الباب والضلمة

الباب والضلمة

بقلمي/عادل عبد الرازق
———————
شبابيك الحيً ..
من غير ضيً
والباب المتوارب من بيتك ضلمة
وحلمت اني أشوفك لكن …
الصمت مساكن
مخنوق جوًاه صوت الكلمة
والباب المتوارب من بيتك ضلمة
***
أنا سطر كان في قصتك
ما بيبتديش ما بينتهيش
وخيال وعدًى في سكتك
ما عرفتنيش ما شوفتنيش
ما سألتكيش مين غيًرك
ولا قلت لك إنتي مين
وكأنك واحدة غيرك ياحبيبتي
وكأنك تايهة وسط الزحمة
***
ما عشقت فيكي غير كتاب
مااملكش منه غير الهوامش
دواير دواير وحزن و مواجع
واللي ماشي زي اللي راجع
كل الشوارع …
ذكريات
كل الغناوي ناقصة نغمة
***
سفر وغربة ومواني
والوصول يا بحر مش مضمون
مش جايز تاخدنا المنافي
أو يا بحر موجك يخون
ماعدتش املك قراري ..
ولا عاد في عقلي أي حكمة
***
إنتي وانا كنا زيف
إنتي وانا كنا سراب
قلوب بتحلم باللؤاه
بس الطريق كان كداب
شبابيك الحيً …
من غير ضيً…
والباب المتوارب من بيتك ضلمة
***
أنا حبيتك من كل قلبي
وانتي حبتيني من كل قلبك
بس فيه يا حبيبتي
ما بينا أزمة
*****
/عادل عبد الرازق